Jeff Landryp neqeroorut akuerisimaneraa Kristian Jeremiassenip uppernarsarusunngilaa
Trumpip Kalaallit Nunaannut immikkut ittumik aallartitaata Jeff Landryp marsimi nunatsinnukalersaarnini Fox Newsimut oqaatigaa. Landry Avannaata Qimussersuaqarnerata nalaani tikeraarnissaanik neqeroorfigisimallugu takornarialerinermik suliaqartoq Kristian Jeremiassen uppernarsaavoq. Landryp tikeraarnialersaarnera KNQK-llu isornartorsiuinera pillugu Kristian Jeremiassen Sermitsiamiit apersorparput.
- Sullitagut pillugit oqaaseqarneq ajorpunga, Kristian Jeremiassen taama oqarpoq, taassuma takornariartitsivik Experience Qasigiannguit ilaquttanilu ingerlataraat.
Assiliisoq: Arnaq Nielsen
Nunatta USA-llu akornanni pisut najummatsisimanarseruttorneranni nutaarsiassat imaaginnavipput.
Nutaarsiassat kingulliit ilagaat Trumpip nunatsinnut immikkut aallartitaata Jeff Landryp nunatsinnut marsimi tikeraarnialersaalernera. Taassumami tikeraarnissaminik pilersaalersimalluni Fox Newsimi apersorneqarnermini oqaatigaa.
Folketingimut ilaasortap Aaja Chemnitzip oqarnera naapertorlugu Jeff Landry Avannata Qimussersuaqarnerani nunatsinniissaaq.
Tassanilu takornariartitsivimmik piginnittoq Kristian Jeremiassen puttuteqqippoq.
Kristian Jeremiassenip takornariartitsivik Experience Qasigiannguit ilaquttanilu ingerlataraat, taassuma Jeff Landry Qasigiannguani Avannaata Qimussersuaqarnerata nalaani misigisassarsiornissaanut neqeroorummik nassissimallugu KNR-imut marlunngormat uppernarsarpaa.
Jeff Landryllu tikeraarnissamik pilersaarnerminik oqaaseqareersorlu Kristian Jeremiassen attavigaarput.
- Uanga oqaaseqarfigisinnaanngilara,
inuttaata saaffiginnissupput oqaaseqarfigiumaarpaa. Sullitassagut pillugit
oqaaseqarneq ajoratta, Kristian Jeremiassen taama oqarpoq.
Sisimiuni siorna Avannaata Qimussersuartoqarnerani amerikamiut tikeraartussanngoraluarmata tusagassiortorpassuit tikipput.
Assiliisoq: Arnaq Nielsen
- Politikki akuliunnianngilara
Kristian Jeremiassen Kommune Qeqertalimmi Inuit Ataqatigiit tunuliaqutaralugu kommunalbestyrelsemut ilaasortaavoq, Inatsisartunullu ukiuni 13-ini ilaasortaareerluni siorna qinersisoqarmat qinigaaqqinngitsoorluni.
Avannaata Qimussersuata amerikamiunit siorna aningaasaliiffigineqarsimanera, aamma USA-mi præsidentip tullersortaata JD. Vancep nuliata Usha Vancep Sisimuni siorna Avannaata Qimussersuartoqarneranut tikeraangajalluinnarnera pititsinikooqaaq.
Takornariartitsiviup saniatigut Kommune Qeqertalimmi kommunalbestyrelsemi ilaasortaavutit. Nunattalu USA-mut ilanngunneqarnissaa siunertaralugu immikkut ittumik aallartitaq Jeff Landry Avannaata Qimussersuaqarnissaanut qaaqquat. Taanna ippinnartoqartinngiliuk?
- Misigisassaq annertoorujuuvoq, nunarsuarmioqatitsinnut
takutinnissaa pingaartorujussuulluni. Politikki
iserfiginianngilara.
Aamma Jeff Landry qaaqqugaluarukkuluunniit?
- Apeqqutaanngilaq, aamma
kikkorparujuit neqeroorusiorfiginikuuagut. Uanga suliffeqarfitsinnut politikki
akuliunnianngilara, Kristian Jeremiassen oqarpoq.
KNQK-p siulittaasua Mikkel Jeremiassen Sisimiuni siorna Avannaata Qimussersuaqarnerata nalaani.
Assiliisoq: Arnaq Nielsen
KNQK: Naleqqutinngilluinnarpoq
USA-p Kalaallit Nunaannut immikkut aallartitaata Avannaata Qimussersuanut qaaqquneqarsimanera naleqqutinngilluinnarnerarlugu Kalaallit Nunaanni Qimussertartut Kattuffiat, KNQK, tusagassiorfinnut ataasinngornerup unnuaani allappoq.
- Matumuuna ilisimatitsissutigissavarput, KNQK-mi siulersuisuunerit akuerinngimmassuk nunatta avataaniit politikkikkut tatiniarneqarnera, taamaattumillu nunatta avataaneersunik Avannaata Qimussersuanut peqataasoqarnissaa tulluanngilluinnartoq isumaqarpugut, KNQK-p siulittaasua Mikkel Jeremiassen taama allappoq.
KNQK-kkut qaaqqusisimanerit akuersaarnagu avammut nalunaaruteqarput. Taanna qanoq illit oqaasissaqarfigaajuk?
- Misigisassarsioqqusivugut qimussimik sukkaniuunnissarsuarmut, aggersaaneq misigisassarsiornerlu assigiinngitsuupput marluk. Suliffeqarfittut uagut ussassaariinnarpugut aamma misigineqarsinnaasut ilagigaat, Kristian Jeremiassen taama oqarpoq.
