Jens-Frederik eqqissisaavoq: Uippallernissamut pissutissaqanngilaq

Naalakkersuisut siulittaasuat, Jens-Frederik Nielsen (D) maanna Katie Millerip attaveqaqatigiittarfikkut X-ikkut saqqummiussaa, Kalaallit Nunaat amerikamiut erfalasuanik qalipanneqarsimasoq pillugu qisuariarpoq.

- Siullertut eqqissisimasumik ersarissumilli oqarlanga uippallernissamut ernumanermullu pissutissaqannginnatta. Katie Miller assi siammarsimasaa, Nunarput amerikap erfalasuanik qalligaq, sumilluunniit allanngortitsinngilaq. 

- Nunarput tuniniagaanngilluinnarpoq, siunissarpullu inuit attaveqatigiittarfianni oqallittarfiisigut ilusilersorneqassanngilaq.  Assiliaq ataqqinninngilaq.

Amerikamiut Kalaallit Nunaata inissisimanera pisinnaatitaaffiilu isiginngitsuusaartippaat

Naalakkersuisut siulittaasuata isumaqarpoq amerikamiut paasisariaqaraat Kalaallit Nunaat takussutissiaannarnut appartinneqarsinnaanngitsoq:

- Nunat inuiaallu ikinngutigiissappata ataqqeqatigiinnermik nunallu tamalaat akornanni pisinnaatitaaffiit aqqutigalugit ingerlatassaavoq - oqariartuutit pisarinninniarnermik imallit inissisimaffitsinnik pisinnaatitaaffitsinnillu soqutiginninngitsut aqqutigineqassanngillat.

- Demokratiip aqqani ingerlavugut, oqartussaaffeqarpugut, kiffaanngissuseqarluta aaliangiisinnaatitaalluta aammalu oqartussaassuseqarnikkut nukittuumik aaqqissuussaanermik pilersitsisimalluta. Nunat tamat akornanni inatsisini pisinnaatitaaffigut inissisimaffippullu naqissuseqqavoq. Inuit pisinnaatitaaffii pillugit allattorsimaffinni naqitanngorluta illersugaavugut, nunallu tamalaat akornanni isumaqatigiissutini ataqqisassatut isigineqarluta. Ersarissumik allaqqapput.Naalakkersuisut toqqissisimasumik akisussaassuseqartumillu sulineq nangeqqissavaat. 

- Oqaloqatigiinnernik pingaartitsilluta ingerlatsivugut, soqutigisagut aalluppagut, nunat tamalaat akornanni malitassat malillugit sulivugut, suleqatitta soorlu taakku aamma pituttorsinaffigigaat.Uippallernissamut pissutissaqanngilagut. Ataqqinninnginnermulli naaggaarluta ersarissumik oqariartuuteqassalluta pissutissaqarpugut, Naalakkersuisut siulittaasuat, Jens-Frederik Nielsen (D), naggasiivoq.

Múte: USA-p iliuusaa ingerlaannassappat suleqatigiinneq apeqquserneqartariaqarpoq

Naalakkersuisut siulittaasorisimasaat, maanna aningaasaqarnermut akileraartarnermullu Naalakkersuisoq kiisalu partiip Inuit Ataqatigiit siulittaasua, Múte Bourup Egede (ia) sukannersumik qisuariaateqarpoq:

- Uagununa nunarput, siunissaa nammineq aalajangigassarput Ataqqeqatigiinneq tatigeqatigiinnermik suleqatigiilluarsinnaanermillu pilersitsisarpoq. Ataqqinninnginnerli suleqatigiinnissamut ungasillisaataasarluni. 

- Amerikamiullu siuttuisa uatsinnut ataqqinninngilluinnarnerat akuersaanngilara taamaattuarniarpatalu suleqatigineqarsinnaanerat apeqquserpara, nunarpummi tiguinnagassaanngilaq. Tatigeqatigiilluni suleqatigiinneq qaqagumut illersugassaavoq. Nunarput pillugu ilungersoqatigiittuassaagut, Múte Bourup Egede naggasiivoq.