KL

DK

Jens-Frederik Nielsen: Arnat eqqarsaatinniipput

Arnat naartunaveersaasersuisimanermut suliamut, spiralilersuisoqarsimanera pillugu suliamik ilisimaneqarnerusumut, attuumassuteqartut taarsiiffigineqarnissaat pillugu inatsit Folketingimi akuerineqarpoq. Naalakkersuisut siulittaasuat Jens-Frederik Nielsen ullumikkut arnat eqqugaasut eqqarsaatigalugit oqarpoq.

- Ullumikkut eqqarsaatikka arnat naartunaaveersaasersorneqarlutik kannguttaattuliorfigitissimasuniipput. Naalakkersuisut siulittaasuat Jens-Frederik Nielsen spiralilersuisimanermut tunngatillugu nalunaarusiat saqqummiunneqarnissaannut aqaguttoq taama allappoq.
KASSAALUK KRISTENSEN Digitalimik aaqqissuisoq
Saqqummersinneqarpoq

- Ullumikkut eqqarsaatikka arnat naartunaaveersaasersorneqarlutik kannguttaattuliorfigitissimasuniipput.

Naalakkersuisut siulittaasuat Jens-Frederik Nielsen (D) Facebookimi sisamanngornermi ullaap tungaani taama allappoq.

Folketingip kalaallit arnat ilisimanagu akuersinatilluunniit spiralilerneqarsimasut 300.000 koruuninik taarsiiffigineqarnissaat ullumi akueraa.

Naalakkersuisut siulittaasuata Facebookimi allakkamini arnat spiralilersuisimaneq pillugu suliamut tunngatillugu anniaateqarlutik, aliasuuteqarlutik aamma apeqqutissarpassuaqarlutik inuusimasut misiginneqatiginninnermik ersersitsivigai.

- Arnat taakku taarsiiffigitinnissaannut suliaq Folketingimi ullumi aalajangiunneqarpoq. Ulloq pingaartuuvoq. Ullorli aamma misigissutsinik qaffakaatitsiuffiuvoq. Iliuuserineqartummi aningaasatigut taarsiinikkut peersinneqarsinnaanngillat. Aningaasat periarfissat annaasimasanut utertitsisinnaanngillat. Aningaasat aliasuutit ikillu inuunermi anniaatigisimasut mamisissinnaanngilaat, Jens-Frederik Nielsen allappoq.

Kingusinaarujussuartut

- Utoqqatserneq aningaasanillu taarsiinerit kingusinaarujussuarput. Arnat ilaasa utoqqatserfigineqarneq misiginngitsoorpaat. Tamanna eqqarsaatigalugu annernarpoq. Eqqarsaatigissallugu annernartarpoq. Taamaattumik neriuutigaara arnat naartunaaveersaasersorneqarsimasut ullumi eqqarsaatigissagigut. Arnat tamavimmik immikkut oqaluttuassartallit. Nammineq inuunillit. Nammineq misigisaqarsimasumut, taanna allappoq nangillunilu:

- Assoroorsimavusi. Oqaluttuarsimavusi. Tusaaneqarnissarsi sukataarutigisimavarsi aamma sakkortugaluaraangat.

Spiralilersuisimanermut tunngatillugu inuit pisinnaatitaaffiinut tunngasut pillugit nalunaarusiat aqagu tamanut saqqummiunneqassapput.

arnat folketingi taarsiiffigineqarnissaat jens-frederik nielsen spiralilersuisimaneq inuiaqatigiit

Atorfiit tamaasa takukkit

PODCASTI

Powered by Labrador CMS