Jens-Frederik Nielsen Københavnimi ukiortaami ilasseqatigiinnermi oqalugiartoq
Kalaallit Nunaata Kunngeqarfimmut ilaalluni massakkutut ingerlaannarnissaa kissaatigaarput. Oqariartuut paatsoorneqarsinnaanngilaq, Naalakkersuisut siulittaasuat oqarpoq.
Kalaallit Københavnimi Nordatlantens Bryggemi sisamanngornermi januaarip 15-iani ukiortaami ilasseqatigiipput, tassanilu qallunaat ministerii arlallit qaaqquneqartut peqataapput.
Assi: Sebastian Elias Uth/Ritzau Scanpix
Naalakkersuisut siulittaasuat Jens-Frederik Nielsen (D) Københavnimi kalaallit ukiortaami ilasseqatigiinneranni oqalugiaqqammerpoq.
Oqaatigereernikuusani politikerillu allat siusinnerusukkut oqaasiisa ilarpassui uteqqippai: Piffissami matumani ataatsimoornissatta pingaaruteqarnera, Kalaallit Nunaat Kunngeqarfimmut Danmarkimut atasoq USA-millu pigineqalerusunngitsoq.
- Kalaallit Nunaat USA-mit pigineqalernavianngilaq. Kalaallit Nunaat USA-mit aqunneqarusunngilaq. Kalaallit Nunaat USA-mut ilaalerusunngilaq. Kalaallit Nunaata Kunngeqarfimmut ilaalluni massakkutut ingerlaannarnissaa kissaatigaarput. Oqariartuut paatsoorneqarsinnanngilaq, oqarpoq.
Jens-Frederik Nielsenip Inatsisartunut siorna marsimi qinersisoqarnerata kingorna Naalakkersuisut siulittaasuattut ukiortaami siullerpaamik oqalugiaarpoq.
Ullut kingulliit kalaallinut ulapaarfioqaat. USA-mi, Kalaallit Nunaanni Danmarkimilu nunanut allanut tunngasunut ministerit sivisuumik utaqqineqarsimasimaqisumi ippassaq ataatsimiipput, tassani Amerikamiut præsidentiata tullersortaa J.D. Vance aamma peqataavoq.
Danmarkip Nato-milu iligisat arlallit, ilaatigut Sverigep, Norgep, Tysklandip, Tuluit Nunaata, Frankrigip, Hollandip Finlandillu, sakkutuuminnik Kalaallit Nunaannukartitsisut ippassaq aamma nalunaarutigineqarpoq.
Ministeriuneq Mette Frederiksen politikkerillu allat arlallit ukiortaami ilasseqatigiinnermi aamma peqataapput.
