Jens-Frederik Nielsen: Oqaluttuarisaanermi suliassat annersarigunagaannik akisussaaffeqarpugut
Inatsisartut Naalakkersuisut nutaat ullumi akuersissutigaat. Ilaasortat nutaat sisamat ilanngunnerisa saniatigut aamma ilaasortaasut akisussaaffii nikititerneqarput.
Jens-Frederik Nielsenip naalakkersuisut nutaat tatigilluinnarpai.
Foto: Oscar Scott Carl
Naalakkersuisut nutaat akuerineqaqqammertut Naalakkersuisut siulittaasuat Jens-Frederik Nielsen (D) tusagassiortunit apersorneqarpoq. Naalakkersuisut aaqqissuussaanerat qanoq isumaqarfigineraa ilaatigut tassani aperineqarpoq:
- Isumaluarfigaakka. Tamatta assigiinngitsunik piginnaasaqarpugut. Tammatta assigiinngitsuneersuuvugut, ilaasortanngortullu nutaat sisamaasut nukissaqarsuaalutik takkupput suliassaminnik kivitsiartorlutik.
- Nunanut allanut politikki eqqarsaatigalugu suliassat annersarigunagaannik suliassaqarpugut, nunalli iluani aamma suliassarpassuaqarpugut naammasserusutatsinnik, oqarpoq.
Vivian Motzfeldtip (attaviitsoq) akisussaaffiginikuusaanik kina akisussaaffeqalerumaarnersoq pissanngatigineqarnerpaat ilagaat. Múte B. Egedep (IA) susassaqarfik akisussaaffigilerlugulu inuussutissarsiornermut aatsitassanullu tunngasut aamma tiguai. Aningaasaqarnermut akileraartarnermullu naalakkersuisuugaluarpoq.
- Múte politikeriuvoq misilittagaqarluartoq akisussaafferujussuarnillu tigummisareersoq. Múte USA-p nunarput perusullugu oqariartuuteqaqqaartarneraniilli Naalakkersuisuni aamma suiulittaasuunikuuvoq. Taamaattumik tulluartuusoq isumaqarpunga, Naalakkersuisuni ilaasortaasugut suleqatigalugu akisussaafferujussuarmik kivitsinissaminut piareersimavoq, Jens-Frederik Nielsen oqarpoq.
Ilaasortanngortut tatigilluinnarai
Naalakkersuisoqarfiit arlallit siornatigut naalakkersuisup ataatsip akisussaaffigisai maanna agguaanneqarput. Ilaatigut meeqqanut inuusuttunullu susassaqarfik ilaqutariinut tunngasuniit avissaartinneqarput, aamma inussutissarsiornermut aatsitassanullu tunngasunut naligiissitaanermut inatsinillu atuutsitsinermut tunngasut avissaartinneqarlutik.
Tamanna sumik pissuteqarnersoq aperineqarami Jens-Frederik Nielsen ima akivoq:
- Naalakkersuisuuffimmi ukioq siullermi susassaqarfiit qanoq sutigullu pitsaanerusumik sunniuteqarnerusumillu suliaqarfigineqarsinnaanerat misigilittagaqarfigileratsigu taamatut aalajangerpugut. Taamaattumik taamatut agguataarinnilluta.
- Isumalluartorujussuuvunga. Isumaqarpunga suliassat agguataarnerisigut suleqatigiilluarsinnaassasugut, aamma ulluinnarni sulianut tunngatillugu ukioq kingulleq misilittakkatta susassaqarfiit tulluarnerat takutippaat.
Naalakkersuisunut ilaasortanngortut ilaat arlallit naalakkersuisutut atorfeqarsimanngillat, Jens-Frederik Nielsenilli suliassamut piareersimanerat qularutiginngilai.
- Aap, suliassamut tamakkiisumik piareersimapput. Naalakkersuisuuneq akisussaaffiuvoq annertooq. Akisussaaffilli taanna sapiillutik nukissaqarlutillu tigusinnaavaat, suliallu annertuup piginnaasatigut piareersimaffigilluinnaraat isumaqarpunga.
