Jens-Frederik Nielsen tusagassiortunik katersortitsinermi: Immikkut ittumik inissisimavugut
Naalakkersuisut siulittaasuat, Jens-Frederik Nielsen (D), nal. 17.00 tusagassiortunik katersortitsinermi USA-p præsidentiata Donald Trumpip oqaaseqaatai kingulliit tunngavigalugit nunatta inissisimaneranik oqaluttuarpoq.
Jens-Frederik Nielsen ataasinngornermi nal. 17.00 tusagassiortunik katersortitsivoq.
Assi: Oscar Scott Carl
USA-p præsidentiata Donald Trumpip ulluni kingullerni sakkortuumik oqaaseqartareernerata kingorna Naalakkersuisut siulittaasuat Jens-Frederik Nielsen tusagassiortunik katersortitsivoq.
Ernumasoqarnera paasisinnaagaa
Jens-Frederik Nielsenip tusagassiortunik katersortitsinermi ernumasoqarnera ima oqaasertalerpaa:
- Siusinnerusukkut oqaatigineqartut uteqqissanngilakka, kisiannili immikkut ittumik inissisimavugut.
- Pisut eqqarsaatigalugit paasilluarsinnaavara innuttaasut Naalakkersuisunut malinnaaniartut ernumallutillu.
- Ernumasoqarnissaali pissutissaqanngilaq, Jens-Frederik Nielsen oqarpoq.
USA oqaloqatiginiarlugu iliuuseqartoq
Jens-Frederik Nielsen oqarpoq Naalakkersuisut “aqqutit eqqortut” atorlugit USA oqaloqatiginiarlugu suli iliuuseqartut.
Aamma oqaatigaa USA-p Kalaallit Nunaatalu akornanni ukiorpassuarni suleqatigiinnerup tatiginninnerullu ingerlateqqinnissaa Naalakkersuisut ingerlatiinnarumagaat.
- Suleqatigiinneq pitsaasoq ingerlateqqikkusupparput, nangillunilu oqaatigaa ataatsimoornissamut piffissaasoq:
- Inuiaqatigiinni ataatsimoornerput takutittariaqarparput, aammali nunat tamalaani iligeriikkatsinni ataatsimoornerput takutittariaqarparput.
Suleqatigiinnissamik ujartuisoq
Jens-Frederik Nielsenip arlaleriarluni erseqqissarpaa Kalaallit Nunaat suleqatigiinnissamut ammasoq:
- Attaveqarnissamut aqqutit eqqortut atortigit, suleqatigiinnissamummi ammavugut. Natomi suleqatigiinneq nukittorsarusupparput. Suleqatigiinnissamut matugut ammapput, Jens-Frederik Nielsen oqarpoq.
Nielsen: Kalaallit Nunaat Venezuelatut inngilaq
Jens-Frederik Nielsen USA-p Venezuelamut akuliunnera pillugu qanoq isumaqarnersoq aammali Kalaallit Nunaat imminut illersorsinnaassanersoq pillugit aperineqarpoq.
Jens-Frederik Nielsen oqarpoq Kalaallit Nunaat allaanerulluinnartoq, aamma Amerikamiut nunatsinnut taama tiguaaniarnissaat pillugu aarlerinartoqanngitsoq:
- USA-mik suleqateqartareerpugut, tamannalu atulerseqqikkusupparput.
Trump toqqaannartumik oqaloqatigerusuppiuk?
Jens-Frederik Nielsenip oqaatigaa USA-mut toqqaannartumik attaveqarnerup atuutileqqinneqarnissaanik sulissuteqartoqartoq.
Trump toqqaannartumik oqaloqatigissaviuk, Jens-Frederik Nielsen aperineqarpoq.
Taanna akivoq aqqutit eqqortut nunat tamalaat nalunngikkaat, aqqutillu eqqortut tassaanngitsut tusagassiorfiit aqqutigalugit attaveqarniarnerit.
Jens-Frederik Nielsenip erseqqissarpaa diplomati aqqutigalugu USA-mik oqaloqateqaqqinnissaq sulissutigineqartoq.
- Suleqatigiinnissarput tamatta pisariaqartipparput, immitsinnut pinngitsoorsinnaanngilagut. Qanoq iliuuseqartariaqarpugut.
Oqaatsit sakkortuut
Jens-Frederik Nielsen sukannernerulaamik oqaaseqarpoq, oqaatigalugu Trumpip oqaasii naammattut, aamma eqqartorpaa ukiorpassuarni ikinngutigiinneq tatineqarsimasoq.
- Suleqatigiinnerup pitsaasup atulerseqqinneqarnissaa sulissutigisariaqarparput, Jens-Frederik Nielsen oqarpoq.
Taanna oqarpoq Naalakkersuisut nalilersimagaat Kalaallit Nunaat unnuakkut tiguarneqarnavianngitsoq.
