Jens-Frederik Nielsen USA-mut: Kalaallit Nunaata killeqarfii pigaagut

Naalakkersuisut siulittaasuat Jens-Frederik Nielsen (D) maanna Naalakkersuisut sinnerlugit Donald Trumpip USA-p Kalaallit Nunaannik pisariaqartitsineraalluni uteqqiineranut qisuariarpoq.

Jens-Frederik Nielsen tamat attaveqaqatigiittarfiini allappoq Kalaallit Nunaat USA-lu kinguaariippassuarni qanittumik tatiginnittumillu ikinngutigiittut.

- Pissutsini erloqinartorsiorfiusuni ikioqatigiittarsimavugut. Atlantikup avannaa, minnerunngitsumillu Amerika Avannarleq, illersornissakkut akisussaaffeqarsimavugut. Tassa ikinngutigiit taamaassapput, Jens-Frederik Nielsen oqarpoq.

Oqariartuutit akuerineqarsinnaanngitsut

Allakkamini nangippoq, USA-p uteqattaarinera akuerineqarsinnaanngitsoq.

- USA præsidentiata maanna oqaaseqaqqinnermini, Venezuela sakkulersorfigineqarnerani taputartuulluta eqqaallatsiarpaatigut “Kalaallit Nunaat atorfissaqartipparput”, oqaatsitigut kusananngilluinnarpoq ataqqinninnginnerujussuullunilu. Nunarput pissaanilerngusaannermi atugassaannartut isigineqarsinnaanngilaq minnerunngitsumik ikinngutit qanigisat aalajaatsullu pineqartillugit. Inuiaajuvugut. Nunaavugut. Demokratiimik nukittuumik atuutsitsisut, Jens-Frederik Nielsen allappoq.

USA-p præsidentiata nutaarsiassaqartitsivimmit The Atlanticimit Venezuelamut saassusisoqarnera pillugu apersorneqarnermini uteqqippaa USA-p Kalaallit Nunaat pisariaqartikkaa.

Tatigeqatigiinnermi ataqqinnittoqartariaqarpoq

Jens-Frederik Nielsenip allakkamini naqissuserpaa Kalaallit Nunaat NATO-mi ilaasoq, aammalu Kalaallit Nunaata ilisimaarigaa nunap inissisimaffia pingaaruteqartoq. 

- Ilisimaaraarpullu aamma illersornissarput ikinngutitsinnit iligisaniillu nukittuunit qanimut suleqateqarnikkut aallaaveqartussaasoq. Taamaattumik pingaaruteqarluinnarpoq USA ataqqeqatigiittumik aalajaatsumillu attaveqarfiginissaa. Ukiorpassuarni soorlu tamanna atuutsinneqarsimasoq. Ikinngutigiinnerli tatigeqatigiinnermiit aallaaveqassooq. Tatigeqatigiinnerlu ataqqeqatigiinnissamik aamma aallaaveqassaaq.

- Ernumasaarinerit, nanertuinerit tiguaaniarnermillu oqariartuuteqarnerit ikinngutigiit akunneranni aallaaviussanngillat. Inuiaat akisussaaffimmik, tatiginninnermik ikinngutinnernermillu takutitsiuarsimasunut taamatut oqaluttoqaannarsinnaanngilaq. Oqalunnerit taamaattut naammaleqaat. Nanertuiniarnerit unitsillugit. Ernumasaarinerit unitsillugit. Tiguaaniarnernut sinnattuaqinerit unitsillugit. Eqqartueqatigiinnernut ammavugut. Oqaloqatigiinnernut ammavugut.

- Tamanna aqqutit eqqortut atorlugit ingerlanneqassaaq aammalu inuiaat pisinnaatitaaffii ataqqillugit. Aqqutilli eqqortut tassaanngillat nittartakkatigut inuit naapittarfiisigut taamungaannaq ataqqinninngitsunillu ilioraanerit. Kalaallit Nunaat uagut angerlarsimaffigaarput aammalu killeqarfipput pigaarput. Tamannalu attatiinnarneqassaaq, Jens-Frederik Nielsen naggasiivoq.