Jens-Frederik Nielsenip Vivian Motzfeldt qujaffigaa: Suleqatigiissitaq alloriarneruvoq pingaarutilik
Naalakkersuisut siulittaasuat USA-mut tunngatillugu pingaarutilimmik alloriartoqartoq, Kalaallit Nunaalli tuniniagaanngitsoq Facebookimi quppernermini allappoq.
Jens-Frederik Nielsenip kalaallit qallunaallu aallartitaasa Washingtonimi sulinerat qujaffigaa.
Assi: Trine Juncher Jørgensen
- Siullertut Nunanut Allanut Naalakkersuisoq Vivian Motzfeldt suliaanut qujaffigerusuppara, taamatuttaarlu aamma Lars Løkke Rasmussen atorfilittallu suleqataasimasut Washingtonimi sinnerluta sassarternerannut.
Naalakkersuisut siulittaasuat Jens-Frederik Nielsen (D) Facebookimi quppernermini taama allappoq. Kalaallit Nunaata, Danmarkip USA-llu ippassaq ataatsimiinnerat pivaa, tassani præsidentip Donald Trumpip Kalaallit Nunaannik aqutsinissamik kissaateqarnera oqaluuserineqarluni.
Jens-Frederik Nielsen ataatsimiinneq pimoorussilluinnartumik torersumillu nipeqartumik ingerlanneqartoq allappoq. Oqaloqatigiinneq maanna aallartimmat, suleqatigiissitamillu illuatungeriit isumaqatigiinngissutaannik suliaqartussat pilersinneqarnera nuannaarutigaa.
- Alloriarneq pingaarutilik. Oqaloqatigiinneq atorfilittarigullu sinaakkusersuinerit alloriaqqinnissanut aqqutit tassa eqqortuupput, aamma soqutiginninneq naqisimanninnerlu annertoorujussuugaluarpataluunniit.
Kalaallit Nunaat tuniniagaanngilaq
Lars Løkke Rasmussen Vivian Motzfeldtilu ippassaq ataatsimeereernerup kingorna tusagassiortunik katersortitsipput, tassanilu Amerikamiut naalakkersuisui isummaminnik allanngortitsisimannginnerat oqaatigalugu. Kalaallit Nunaat suli perusuppaat.
Taamaattumik Jens-Frederik Nielsenip Kalaallit Nunaat kalaallinit pigineqartoq allatamini erseqqissaatigeqqippaa.
- Kalaallit Nunaat USA eqqissisimasumik oqaloqatiginissaanut piareersimajuaannarsimavoq, taamatuttaarlu nunat tamalaat suleqatigisagut. Oqaloqatigiinnerli aaqqissuussaanikkut nukittuumik inissisimanerput ataqqillugu ingerlassaaq, inuit pisinnaatitaaffit aallaavigalugit taamatuttaarlu Nunarput immitsinnik piginissaanut pisinnaatitaaffeqarnerput, allappoq.
Kalaallit Nunaat tuniniagaanngitsoq Danmarkillu Kunngeqarfianut atasoq uteqqippaa.
Jens-Frederik Nielsenip naalakkersuisut siulittaasuata tullia Múte B. Egede (IA) ippassaq unnukkut tusagassiortunik katersortitsinermi oqaasia assigalugu ataatsimoornissaq kaammattuutigaa.
- Illersornissamut politikkikkut inissisimanerput erloqinartumiippoq, nunatullu killeqarfitsigut inissisimaffipput soqutigineqartorujussuulluni. Ernumassutigineqarnera paasilluarsinnaavara. Tamanna peqqutigerpiarlugu ataatsimoornerput iligullu illersortissagut inissisimaffiginissai pingaaruteqarpoq.
- Maannakkut ilutsinni aaqqiagiinngissuteqarnissarput piffissaanngilaq.Ataatsimoornissamut, eqqissisimanissamut aammalu akisussaassuseqarnissamut piffissaavoq.Inissisimaffik qanimut malinnaavigeqqissaarpara, ilagaassilu Nunarput paarilluarnissaanut.
