Jens-Frederik sioorasaarisoqaqqereersoq:
- Naqisimaneqarnianngilagut
Naalakkersuisut siulittaasuata Donald Trumpip sioorasaareqqinnera Kalaallit Nunaata isumaanik allannguinngitsoq oqarpoq.
Jens-Frederik Nielsen (D) politikerit nuimasut allat peqatigalugit USA-p Kalaallit Nunaannik tiguaarusunneranut Nuummi arfininngormat akerliussutsimik takutitsisoqarnerani peqataapput.
Assi: Oscar Scott Carl
- Kalaallit Nunaat demokrati aqqani ingerlasumik aammalu namminneq aaliangiisinnaassuseqarlutik inuiaqatigiiusut naqissuserneqarmat.
- USA-miit kingullertigut oqariartuutigineqartut, ernumasaarinerit akileraarusersuinerillu, pingaartitanut allannguisinnaanngillat. Naqisimaneqarnianngilagut. Oqaloqatigiinnerit eqqortut, ataqqeqatigiinneq aammalu nunat tamalaat akornanni pisinnaatitaaffiit ataqqillugit ingerlanissaq aaliangiusimavarput, Jens-Frederik Nielsen (D) Facebookimi quppernermini allappoq.
USA-p Kalaallit Nunaata akisussaaffigilernissaa isumaqatigiissutigineqanngippat, Danmark Europamilu nunat arlallit akitsuusiiffigineqassasut præsidenip weekendimi sioorasaarutigigaluaraa, Kalaallit Nunaata isummani allanngortinngikkaa naqissuserpaa:
- Naqisimaneqarnianngilagut. Oqaloqatigiinnerit eqqortut, ataqqeqatigiinneq aammalu nunat tamalaat akornanni pisinnaatitaaffiit ataqqillugit ingerlanissaq aaliangiusimavarput, Jens-Frederik Nielsen oqarpoq.
- Vivianip tunuliaqutserpara
Aammattaaq Naalakkersuisut siulittaasuata nunanut allanut tunngasunut naalakkersuisoq Vivian Motzfeldt (S) illersornissamut ministeri Troels Lund Poulsen peqatigalugu NATO-p generalsekretæria Mark Rutte Bruxellesimi ataasinngornermi ataatsimeeqatiginera tamakkiisumik tapersersorpaa:
- Matumani naapinnermi Issittumi illersornissaq pineqartillugu uagut peqataatilluta aammalu nunatta alloriartinnissaanut immineq akisussaaffissarput ataqqineqarnissaanik aallaavilimmik oqaloqatigiinnerit pissasut ersarissumik apuuteqqinnissaa pingaaruteqarpoq.
- Vivian tamakkiisumik tunuliaqutserpara, qularinngilaralu isummagut ersarissumik naleqartumillu ataatsimiinnermut apuukkumaarai, Jens-Frederik Nielsen allappoq .
Weekendimi akerliussutsimik takutitsinermi tapersersuisorpassuit qujamasuutigigai
Kalaallit Nunaanni Danmarkimilu weekendimi akerliussutsimik takutitsinerit inuit ataatsimoornerannik takutitsisut aamma eqqaavai.
- Inuppassuit nunaminnik asanninnerminnik aammalu demokratiimik ataqqinninnerminnik eqqissisimasumik oqariartuuteqarput. Tamannalu uanga aamma qujamasuutigeqaara, allappoq, nangipporlu:
- Ilutigisaanik nunanit allaniit siuttuniillu tapersersorneqarnerput ersarissarneqarpoq. Sulilu tapersersuineq annertusiartorluni. Isumalerujussuuvoq. Akuliunnertut isigisassaanngilaq, taamaattorli Kalaallit Nunaat demokrati aqqani ingerlasumik aammalu namminneq aaliangiisinnaassuseqarlutik inuiaqatigiiusut naqissuserneqarmat.
