Jørgen Isak Olsen toquvoq

Aalisarnermut Piniarnermut Nunalerinermullu Naalakkersuisoqarfimmi ukiuni qulini pisortaasimasoq, Jørgen Isak Olsen, toquvoq. Kalaallit Arsaattartut Kattuffiat, KAK, Facebookkimi quppernermini allappoq.

- KAK-mi aliasungaarluta nalunaarut tigusimavarput, Jørgen Isak Olsen – Erni – unnuaq tassanngaannartunik toqukkut qimaguttoq, kattuffik allappoq.

Jørgen Isak Olsen Kalaallit Arsaattartut Kattuffianni allaffissornermut pisortanngortoq, taamaalillunilu kattuffiup qullersaqarfiani aqutsisunut ilannguttoq, KAK Facebookkimi quppernermini sapaatit akunnerisa siulianni allappoq.

- Erni ukiuni arlalinni Kalaallit Nunaanni timersornermi annertuumik sunniuteqarsimavoq, ataatsimoornermut aammalu timersornerup Kalaallit Nunaanni ineriartortinneqarnissaanut nukittuumik oqaaseqartartuulluni. Piffissami matumani artornartumi eqqarsaatigut siullermik Ernip ilaqutaanut qanigisaanullu ingerlatippagut, KAK allappoq.

Ukiuni qulini naalakkersuisoqarfimmi pisortatut

Jørgen Isak Olsen 1969-imi inunngorpoq. Naalakkersuinikkut ukiuni qulikkaani arlariinni atorfilittut sulivoq. Akileraartarnermut pisortaqarfimmi aamma Akileraartarnermut Aqutsisoqarfimmi 1996-imit atorfeqarpoq. Aalisarnermut Piniarnermut Nunalerinermullu Naalakkersuisoqarfimmi 2009-imi atorfinippoq. Naalakkersuisoqarfimmi tassani aqutsisutut misilittagartuujuvoq. Immikkoortortaqarfimmi aqutsisutut pisortallu tulliatut.

Jørgen Isak Olsen Aalisarnermut Piniarnermut Nunalerinermullu Naalakkersuisoqarfimmi 2013-imi pisortanngorpoq. Naalakkersuisoqarfimmi tassani 2023-imi septembarip arfineq-aappaat tikillugu pisortaavoq. Jørgen Isak Olsenip atorfimminit tunuartitaasimanini Sermitsiamut taamani uppernarsarpaa, tamannali sumik tunngaveqarnersoq itisilerumanagu.

Jørgen Isak Olsen assammik arsarnermik soqutigisaqartuuvoq sungiusaanermillu misilittagaqarluarluni.  Jørgen Isak Olsen assammik arsartartut kattuffianni siusinnerusukkut aamma siulittaasuuvoq.