JUKKU KIELSEN
– Kalaaleqatikka qaa aamma ilissi qaqqassinni erfalasuliiartoritsi!
Jukku Kielsenip Nuummi Ukkusissani Erfalasorput pingasunngornermi ualigaa amuaa. Nunatta USA-llu akornanni pisut sunnertisimaffiginerini erfalasuleriartussalluni aalajangerpoq. Nunatsinnut tikittut sumut tikinnertik nalornisiginnginniassammassuk nunaqqatini imminermisulli qaqqanut erfalasulissasut kaammattorpai.
Jukku qummullu ingiaqatini alla pingasunngornermi pingasup qaangeraalu Ukkusissanut qaqqipput, tassanilu Erfalasorput amuaat.
Assi: Nammineq pigisaq
Nunatta, Danmarkip USA-llu akornanni pingasunngornermi ataatsimiinneq nunarsuarmit tamanit malinnaaffigineqartoq naammassilluinnartorlu Jukku Kielsen ingiaqatinilu Ukkusissat qaavanut apuupput.
Pingasunngornermi nalunaaqutaq ataatsimut qummut aallaramik akunnerni marlunni qummukareerlutik kiisami apuummata seqineq nuivoq.
- Erfalasorput ikkukkakku allaanngilaq qullilingajaavillunga sunaanerpa qaamaneq takullugu. Aammaluunniimmi eqquffaarillugu seqineq nuigami saqqarluta kusanartorujussuanngorluni. Pissatsisimaarnaqaaq aamma killitsisimanaqaaq, Jukku Ukkusissat suli qaavaniitilluni qamanngavik anersaarululluni taama oqarpoq.
Jukkup ingiaqatinilu Erfalasorput amugaallu seqineq nuivoq.
Assi: Nammineq pigisaq
Aqqut navianartoq
Nunatta USA-llu akornanni pisunit sunnertisimanermini Jukkup Erfalasorput Nuummi Ukkusissanut amujartussallugu isumassarsisimasoq qummukanngitsiarnerani oqaloqatigigatsinni nassuiaatigaa.
Aqqutaat nunatta ilungersunartumik inissisimaneranut assersuunneqarsinnaalluarpoq.
Nunami quasallunilu mianersunngikkaanni navialiffiusinnaavoq.
Nalunaaquttap akunnerata aappaa avillugu ingerlaarnissartik naatsorsuutigigaluarlugu nalunaaquttap akunneri marlungajaat atoreerlugit qaqqaq 722 meterisut portutigisoq qaqivaat. Aqqutaanilu tusarnaaruserlutik pisunut malinnaagamik USA-mi ataatsimiittut naammassiffaarittullu apuunnertik immikkut isumaqartippaa.
- Uneriarmata Erfalasorpullu amussallugu aallartillugu suna tamarmi katittuusigami. Assut toqqissiallannarpoq sukkut pinerpoq, Jukku oqaluttuarpoq.
Allat taamaaliornissaannik kaammattorpai
USA-p nunatsinnik tiguaanialersaarnerani nunaqqatigiit ataatsimoortariaqalersugut Jukku Kielsen isumaqarpoq.
- Kalaaliunerput ataqatigiilluta ingerlattariaqalersoraara, avissaartuuttoqarnani.
Erfalasutsinnillu qaqqanut assigiinngitsunut amusineq iliuutsinut ilaaginnarnani avataanit tikittut sumut tikinnerinik nalorninnginnissaanut takutitsisinnaasoq Jukku isumaqarpoq, taamaammat nunaqqatiminut kajumissaarivoq.
- Kalaaleqatikka qaa, aamma ilissi qaqqassinni erfalasuliiartoritsi. Tikittoqaraangat takuneqartarniassooq tassa Kalaallit Nunaat, Jukku Ukkusissanit ammut ingerlaarnermini taama naggasiivoq.
Aqqutaa quasammat ilimagisaminit sivisunerusumik qummukarsimallutik Jukku oqaluttuarpoq.
Assi: Nammineq pigisaq
