Kalaallit atuartut qallunaanut aningaasaliissutinut qinnuteqarsinnaalersut: Naalagaaffeqatigiinni inuusuttut imminnut tikaartassapput
Naalagaaffik naalagaaffeqatigiinnerup iluani attaveqatigiinnermik pitsanngorsaaniarluni arlalitsigut suliniuteqarpoq. Meeqqanut inuusuttullu ukkatarineqarput.
Aningaasaliissutit nutaat atuartut paarlaasseqatigiittarnissaannut ataatsimullu ilinniagaqartarnissaannut atorneqartussat aalajangiunneqarneranni Kalaallit Nunaata, Savalimmiut Danmarkillu erfalasui Københavnimi Nordatlantens Bryggemi amuneqaqqapput.
Assi: Thomas Rasmussen / Gonzalesphoto / Ritzau Scanpix
Danmarkimi atuartut Kalaallit Nunaannut Savalimmiunulluunniit tikeraarnissaminnut 2019-imiilli ukiumut 3,3 millionit koruuninik qinnuteqarsinnaapput.
Ukioq mannali malittarisassat allanngortinneqarput: Kalaallit savalimmiormiullu atuartut Danmarkimukarnissamut imaluunniit imminnut tikeraarnissamik aningaasanik tapiiffigineqarsinnaalerput.
Kalaallit Nunaat Savalimmiullu aningaasanut taakkununnga qinnuteqarsinnaalernerat ilutigalugu ukiumut aningaasaliissutaasartut 1 millionit koruuninik ilaneqarput, tassa katillugit 4,3 millionit koruuniulerlutik.
Naalagaaffeqatigiit ataqatigiinnerulernissaat siunertaavoq, nunallu tamarmik immikkut ilinniarfinnut aningaasanik agguaassinissaq isumagissallugu.
ATLANTIKUP AVANNAANI ILINNIARNERTUUNNGORNIARFIK
- Sunaava: Ukiuni pingasuni ilinniarnertuunngorniarfik, Kalaallit Nunaannit, Savalimmiunit Danmarkimiillu ilinniartut atuaqatigiit.
- Qanoq aaqqissuussaava: Klassit Naalagaaffeqatigiinni nunani nuuttaqattaartarput. 1.g Gribskov Gymnasiumimi (Danmarkimi), 2.g Miðnám á Kambsdalimi (Savalimmiuni) aamma 3.g GUX Sisimiuni (Kalaallit Nunaanni) atuartarput.
- Siunertaq: Ikinngutigiinneq ulluinnarnilu inuuneq aqqutigalugit oqaatsit, kulturi pinngortitarlu pillugit inuusuttut akornanni ilisimasaqarnerulernissaat.
Atlantikup Avannaani Ilinniarnertuunngorniarfik pitsanngorsarneqassasoq
Atlantikup Avannaani Ilinniarnertuunngorniarfik 2019-imiilli misiliutitut ingerlanneqarpoq, maannalu aalajangersimasumik periarfissaalerluni. Naalagaaffiup ilinniarfik ukiumut 3 millionit koruuninik aningaasaliiffigisassavaa.
2028-miit ukiumut 2 millionit koruunit Gribskov Gymnasiumimi ineqarfiutigaluni nerisaqarfiusup sanaartorneqarnissaanut ingerlannissaanullu aningaasaliissutaasalissapput. Kalaallit Savalimmiormiullu Atlantikup Avannaani Ilinniarnertuunngorniarfimmi atuartut Danmarkimiinnerminnu aalajangersimasumik toqqissisimanartumillu najugaqarnissaat qulakkeerneqassaaq.
Sapaatip-akunnera naalagaaffeqatigiinnermut tunngasoq
Naalagaaffeqatigiinneq tatineqarpoq, taamaattumillu ministerip Danmarkimi meeqqat ataqatigiinnerulernissaat anguniarlugu Kalaallit Nunaat Savalimmiullu pillugit ilinniartinneqarnerusalernissaat kissaatigaa.
- Nunarsuarmi pissutsit maanna atuuttut tamat oqartussaaqataanerannut tatisipput. Nunarsuarmi eqqissiviilliornerit ataqatigiinneq taamaattussaannartut isiginagu attanneqartariaqarneranik eqqaasippaatigut. Naalagaaffeqatigiinneq nukittorsarneqartariaqarpoq, tamannalu atuarfinni aallartinneqassaaq, meeqqanut ilinniartitaanermullu ministeri Mattias Tesfaye oqarpoq.
Taamaattumik 2027-miit sapaatip-akunnera Naalagaaffeqatigiinnermut tunngasumik sammisaqarfiusoq atuarfimmi atuartitsissutigineqartalissaaq, tassani naalagaaffeqatigiit oqaluttuarisaanerat ullumikkullu killiffiat sammineqassapput.
2026-mi 2 millionit koruunit, tamatumalu kingorna ukiumut 1 millionit koruunit, Kalaallit Nunaat Savalimmiullu pillugit ilisimasaqarluartut suleqatigalugit ilinniartitsissutissanik ineriartortitsinissamut immikkoortinneqassapput.
Qallunaat atuartut qanga pisimasut pillugit ilinniartinneqaannaratik aammali naalagaaffeqatigiit maanna qanoq ataqatigiinnerisa paasisaqarfiginissaat anguniagaavoq.
Naalagaaffeqatigiinnermi pinngitsoorani atuartitsissutit
Danmarkimi oqaluttuarisaaneq pillugu atuartitsinermi naalagaaffeqatigiinneq pillugu ilinniartitsisarneq aalajangersimasuuvoq, maannali ilinniartitaanermut ministerip tamanna suli annerusumik sammineqarnissaa anguniarpaa, meeqqallu atuarfianni fagini allani qanoq ilanngunneqarsinnaanersoq misissorniarlugu.
