Kalaallit ilaasortat naalakkersuisut tunngavissaat akueraat: Tasiilamut immap naqqatigut kabeli annaassiniartartunullu pitsanngorsaaneq
Danskit naalakkersuisuisa nutaat naalakkersuisoqatigiinnissamut tunngavissaanni Kalaallit Nunaannut tunngasut arlaqarput, Kalaallit Nunaannut Folketingimi ilaasortat marluk oqarput.
Kalaallit Nunaanniit Folketingimut ilaasortat marluk Mette Frederiksen marlunngormat naggataarutaasumik ataatsimeeqatigaat.
Assi: Naleraq
Kalaallit Nunaat sinnerlugu Folketingimut ilaasortat marluk, IA-meersoq Naaja H. Nathanielsen aamma Naleqqameersoq Qarsoq Høegh-Dam, Marienborgimi marlunngornermi ullaap tungaani naggataarutaasumik ataatsimiigiaqqusaapput.
Tassani naalagaaffeqatigiinneq pillugu naalakkersuisunngortut tunngavissaannut immikkoortoq: "Naligiimmik naalagaaffeqatigiinneq"-mik qulequtalik saqqummiunneqarpoq, isummerfigineqarsinnaallunilu oqaaseqarfigineqarsinnaasoq. Suliarineqarnera inerneralu taakku marluullutik naammagisimaarpaat.
– Naalakkersuisut tunngaviat tapersersorparput. Angusaqarluarfiusumik oqaloqatgiippugut, Qarsoq Høegh-Dam oqarpoq, taassumalu susassaqarfiit nunatsinnut angerlaanneqanngitsut danskit akisussaaffiinut naleqqussarneqarnissaannik anguniagaqarnini uani qinigaaffimmi pingaartippaa.
Annaassiniartartut upalungaarsimasut pitsanngorsaavigineqarnissaat
Naleqqap qineqqusaarnermini Kalaallit Nunaanni ujaasinermik annaassiniarnermillu upalungaarsimasut pitsanngorsaavigineqarnissaat, assersuutigalugu qulimiguulimmik angalanerulersinnaaneq, pingaartissimagaa, Qarsoq aamma oqarpoq.
– Kalaallit ilaqutariit pisinnaatitaaffii uangattaaq pingaartippakka, taamaattumik nunap inoqqaavisa pisinnaatitaaffiinik qulakkeerinninnissaq aamma nunani tamalaani najoqqutassianik misissuinissaq kiisalu kalaallit meerartaat Danmarkimilu kalaallit ilaqutariit pisinnaatitaaffiinik qulakkeerinninneq naalakkersuisunut tunngaviusunut ilaammatt naammagisimaarpara.
– Taamaattumik isumaqarpunga naalakkersuisut tunngaviat "oranginerulaalersimasoq", Qarsoq Høegh-Dam oqarpoq.
Tasiilamut immap naqqatigut kabeli
Naaja H. Nathanielsen oqaloqatigiinneq angusaqarfiulluartoq oqarpoq, aamma Qarsoq Nalerarlu qanimut suleqatigiillutik ataqatigiissaarisimasut.
– Qanimut suleqatigiinneq isumaqatiginninniarnernut pitsaanerulersitsipput. Pingaartumik Tasiilamut immap naqqatigut kabelimik aqquteqarnissaq maanna aalajangerneqarmat nuannaarutigaara, aamma nunanut allanut tunngasutigut oqartussaassuseqarnerulernissaq anguniarlugu alloriartoqarmat.
- Tamatuma saniatigut oqaluttuarisaanermi ataqatigiinnitsinnit pisimasut nuanninngitsut naammassineqarnissaat, inatsisitigullu ataataqanngitsunut qitornavissianngortinneqarsimasunullu pisortatigoortumik utoqqatsertoqarnissaa uannut pingaartorujussuuvoq, Naaja H. Nathanielsen oqarpoq.
