Kalaallit kulturiannik pinngortitamillu pingaartitsisoq MIO-mik nersornaaserneqarpoq

Meeqqat piniaqatigisarlugillu nunatta pissarititaanik qanoq pilisinnaanerannik ilinniartippai. Nunattalu naasui atorlugit qanoq tiiliortoqarsinnaanersoq, saarngit amillu pinnersaasiarineqarsinnaaneri ilinniutigisarpai.

Kuka Thomassen Hoffmann Kangerlussuarmiu MIO-p ukioq manna nersornaaserneqartussatut, MIO-miit aamma Meeqqat pillugit Siunnersuisoqatigiinniit, toqqarneqarpoq.

- Meeqqat siunnersuisoqatigiivini Kukap Kalaallit Nunatta kulturiata pinngortitaatalu attatiinnarneqarnissaannut – aamma kalaallit ileqqutoqaannik meeqqanut ingerlateqqiineranut – peqataalluarnera pingaartissimavarput. Taamaasilluni taassuma sulinerata meeqqat namminneq kulturimik ineriartortitsinissamut aamma kulturikkut aliikkusersuinernullu peqataasinnaatitaanerannik tapersersuivoq, meeqqat pillugit oqaaseqartartoq Stina Sværd nassuiaavoq.

Innersuunneqartut 90-it

MIO-p nersornaasiuttagaa ukiut tamaasa Naalagaaffiit Peqatigiit Meeqqanut Ullorititaanni inummut, peqatigiiffimmut suliniaqatigiiffimmulluunniit, Kalaallit Nunaanniittumut meeqqanut taakkualu pisinnaatitaaffiinut immikkut iliuuseqarsimasumut tunniunneqartarpoq.

Inunnit, eqimattanit peqatigiiffinnillu assigiinngitsunit 47-neersut katillugit 90-init nersornaaserneqarnissamut innersuunneqarsimammata, meeqqat pisinnaatitaaffii pillugit sullissivimmiit nersornaaserneqartussamik toqqaaniarneq ukioq manna unammillernarsimavoq.

- Naak 2025-mi MIO-p nersornaasiuttagaanut ataasiinnarmik tunniussisinnaagaluarluta, nunatsinni meeqqanut inuusuttunullu sunniuteqarluartumik suliniuteqarsimasunut maligassiuisunut tamanut qujanarujussuaq. Tamatsinnit ullut tamaasa – MIO-p nersornaasiuttagaanik tunniussinermiinnaanngitsoq - nersorniarneqartuartariaqarput, Stina Sværd naqissusiivoq.