Kalaallit Nunaanni kræftimik napparsimasunut siunnersuisarfik siulleq ammarneqarpoq

Kræftimik Napparsimasut Illuat Nuummi tallimanngormat atoqqaarfissiorneqarpoq, oqalugiartoqarluni nipilersortoqarlunilu takornariartitsisoqarpoq.

Ammaanersiorluni nalliuttorsiornermi tamanna pivoq, ilaatigut Peqqissutsimut Innarluutilinnut Naalakkersuisoq, Anna Wangenheim, aamma peqataavoq.

Siunnersuisarfik pilersinneqarnissaata tungaanut ukiuni arlalinni pilersaarusiortoqarpoq, sanaartornerlu siorna maajimi aallartinneqarluni.

Suliniut Neriuffiit Kattuffiat aamma Danmarkimi Kræftens Bekæmpelsep qanimut suleqatigiissutigaat.

Kræftimik nappaatillit illuat siullersaalluni Kalaallit Nunaanni pilersinneqartoq, Dronning Ingridip Napparsimmavissuata, SANA-p, ungasinngisaani ippoq.

Illup iluani kræftimik eqqugaasut akeqanngitsumik siunnersorneqarsinnaallutillu ilisimasaqarnerulersinnaapput, allallu assingusumik atugallit naapinneqarsinnaallutik.

- Kalaallit Nuannaani kræftimik nappaatilinnut qanigisaasunullu ulloq manna pingaarutilerujussuuvoq. Illu nutaaq aqqutigalugu inuit kræftimik eqqugaasut toqqissisimanerulernissaannut pitsaanerusumillu ikiorneqarnissaannut alloriarneruvoq pingaarutilik, Neriuffiit Kattuffianni siulittaasoq Inger Eriksen oqarpoq.

Kalaallit Nunaanni pissutsinut pisariaqartitanullu naleqqussagaq

Kræftens Bekæmpelse kræftrådgivninger i Danmark isumassarsiorfigalugu illu pilersinneqarpoq, Kalaallit Nunaannili pissutsinut pisariaqartitanullu naleqqussarlugu ineriartortinneqarluni.

Kattuffik ilaatigut Københavnip eqqaani Herlevimi, Esbjergimi Herningimilu kræftimik napparsimasunut siunnersuisarfeqarpoq, Nuummilu maanna siunnersuisarfimmik, ammaalluni.

- Kræftimik napparsimasut illuat ullumi naammassisoq, takullugu nuanneqaaq. Illup sananeqarnerani Kalaallit Nunaanni kattuffik suleqatigisarput qitiulluinnartumik suliniuteqartuuvoq, Kalaallit Nunaanni kræftimik eqqugaasunut iluaqutaasussamik – ataatsimoorluta qanoq angusaqaqatigiissinnaanitsinnik illup pilersinneqarnera takutitsivoq, Jesper Fisker, Kræftens Bekæmpelsemi pisortaaneq oqarpoq.

Inuit 250-it missaat Kalaallit Nunaanni ukioq manna eqqarsaatigalugu, kræfteqalerput. Kræftilernissamut navianaat nunani avannarlerni allanit malunnaatilimmik qaffasinnerunngilaq, akerlianilli kræftimik toqquteqarsinnaaneq nunani avannarlerni allanit tamanit Kalaallit Nunaanni annerpaavoq, NORDCAN-ip kisitsisaataani kingullerni tamanna takuneqarsinnaavoq.

Illu A.P. Møller Fondenimit 10 million koruuninik tapiiffigineqarpoq, Kræftens Bekæmpelse aamma Knæk Cancer aqqutigalugu katersuinermit 10 million koruuninik tapiissuteqarpoq, Neriuffiillu Kattuffiat nuna tamakkerlugu katersuiniarnerminit 8 million koruuninik tapiissuteqarluni. Namminersorlutik Oqartussat aamma Nunamut Namminermut Peqqissutsimullu Ministereqarfiup Atlantikup Avannaani immikkoortortaqarfia illuliornermut aningaasaleeqataapput.

Kræftimik Nappaatillit Illuat Nuummiunut taamaallaat neqeroorutaaginnanngilaq. Digitalikkut siunnersuinikkut illu aamma nunaqarfinni isorliunerusunilu najugaqartunut attaveqarsinnaavoq, Kræftens Bekæmpelse allappoq. Neriuffiit Kattuffiata qullersaqarfia Nuummilu immikkoortortaqarfia aamma tassaniipput.

- Neriuutigaara illu taanna inunnut kræftimik eqqugaasunut ataatsimoorfiullunilu neriuuteqalersitsissasoq – aamma Kalaallit Nunaanni tamarmi, sumiluunniit najugaqaraluaraanni, ikiorneqarnissamut periarfissaqalissapput, Helen Bernt Andersen, Kræftens Bekæmpelse-mi siulittaasoq oqarpoq.