Kalaallit Nunaanni Sullivinnik Nakkutilliisoqarfik nutaamik pisortartaarpoq
Greenland Business Schoolimi pisortaanikup Kalaallit Nunaanni suliffiit pitsaasuunissaat isumannaatsuunissaallu sulissutigissavai.
Christel Lund Bøjler Kalaallit Nunaanni ukiuni 20-ngajanni sulinermik misilittagaqarpoq, taamaammallu politikkilerinermi allaffissornikkullu aatsaat suliaqalissanani.
Assi: Sullivinnik Nakkutilliisoqarfik
Christel Lund Bøjler Kalaallit Nunaanni Sullivinnik Nakkutilliisoqarfimmi pisortatut atorfinitsinneqarpoq. Suliffeqarfiit pitsaasuunissaat isumannaatsuunissaallu sulissutigissavai.
Sullivinnik Nakkutilliisoqarfik tusagassiuutitigut nalunaarummi allappoq.
Christel Lund Bøjler Kalaallit Nunaanni ukiuni 20-ngajanni sulivoq, taamaammallu politikkikkut allaffissornikkullu suliaqarnermi misilittagaqarluarluni. Politikkerinik atorfilittaanullu siunnersortaasarlunilu suleqateqartarnikuuvoq, kingullermillu Greenland Business Schoolimi pisortaalluni.
- Piginnaasakka assigiinngitsorpassuit atortassallugit atorfiup allaaserineqarnerani takusinnaavara – aqutsinermiit allaffissornermut ingeniøritullu sulianut. Tamanna qilanaareqaara, soorluttaaq Kalaallit Nunaanni Danmarkimilu suleqatissama suleqatigilernissaat qilanaarilluinnariga, Christel Lund Bøjler oqarpoq.
Christel Lund Bøjler Kalaallit Nunaannik ilisimasaqarluarnera ingeniøritullu ilinniagaqarnera pissutigalugit atorfinitsinneqartoq Nakkutilliisutut pisortaq Karsten Refsgård oqarpoq.
- Christel Lund Bøjlerip pisortatut sulisunik peqataatitsinikkut kulturimillu paasinninnermigut takorluuisinnaassuseqarlunilu iliuuseqarsinnaassuseqarnerata Sullivinnik Nakkutilliisoqarfimmi aamma Kalaallit Nunaanni inuiaqatigiinnut tunniussassaqarnini takutippaa, oqarpoq.
