Kalaallit Nunaat naammaginartumik kiffartuussivoq

Kalaallit Nunaanni piffik aalajangersimasoq innuttaasunit naammagineqanngikkaagat isornartorsiuineq ullualuit qaangiutinngitsut aallartittarpoq.

Isornartorsiuineq nunap iluaniit pinngikkuni avataanit pisarpoq, Trumpip peqqinnissaqarfik, isumannaallisaanermullu politikki, malittaasalu aatsitassarsiornermut politikki pillugit isornartorsiuisarnerat arlaleriarluta tusartarparput.

Isornartorsiuinerit ilaat allanit pissutissaqarnerusinnaapput, kisiannili eqqarsaat mumisikkusuppara: Innuttaasut qanoq kiffartuussineqarnissartik naatsorsuutigisinnaavaat?

Assersuuteqassaanga. Københavnimi atorfininnissaq pillugu oqaloqatigineqarninni, Kalaallit Nunaannut angerlarnissara siunertaralugu kigutilerisutut sulilernissannut periarfissarsiorpunga. Ataatsimiinnermi danskit kigutit nakorsai amerlasuut peqataapput, taakkualu sullitatik qanoq sullittariaqarnerlugit danskit kigutilerisuattut isiginnittaaseqarput.

Kalaallit Nunaanni kigutilereriaatsit ilisimatuussutsikkut neqeroorutigineqarsinnaasut tamaasa neqeroorutigineqarnissaannut aningaasanik sulisunillu amigaateqarneq pissutigalugu, qanoq suliarinnittartoqartarnera suullu suliarineqarsinnaanngitsut tusaramikku tupaallaatigeqaat. Kalaallit Nunaanni kigutilerinermi neqeroorutigineqartut imaluunniit danskit kigutilerisuisa qisuariarnerat uanga tupaallaatiginngilakka.

Ulluinnarni kigutilereriaatsit eqqarsaatigineqarsinnaasut tamaasa atorlugit suliaqartarpunga, suliarisamami ilisimavaat akiligassatik namminneq akilertussaallugit. Danmarkimi kigutileriffinni allani siusinaartumik soraarnerussutisiallit amerlasuut sullinneqartarput, taamaattoqartillugu kommune akiliisarpoq, taamaattumillu kommunip missingersuutaanit aalajangerneqartarpoq qanoq kigutilerineq ingerlanneqassanersoq.

Kalaallit Nunaanni aamma taamatut periuseqartoqartoq nassuiaappakka, tamaani suut tamarmik pisortat missingersuutaannit tunngaveqarmata. Aningaasanut inatsimmi kigutilerinermut aningaasaliissutigineqartut aamma Kalaallit Nunaanni innuttaasut qanoq amerlatigineri naatsorsupallappakka. Sullitaq ataaseq agguaqatigiissillugu arlaleriarluni kigutileritinneq ajorpoq, taamaattumillu pinaveersaartitsinerup pingaartinnissaa pingaaruteqarpoq.

Kalaallit Nunaanni sumiiffinni amerlanerni kigutit nakorsaqarfii pisortanit isumagineqartut periarfissaapput, taamaattumik annerusumik suliarineqarumalluni tapiissuteqarluni akiliinissaq iluaqutaanngilaq. Tamanna danskit kigutit nakorsaasa tupaallaatigaat.

Piffinni assigiinngitsuni arlariinni pissutsit aamma taamaapput, tassami sumiiffinni aalajangersimasuni kiffartuussinissamut aningaasartuutit pisortat missingersuutaannit aalajangerneqartarput.

Kalaallit Nunaanni sulisut amerlassusaat eqqarsaatigalugu ullutsinnitut pitsaatigisumik kiffartuussinissaq ajornarsinnaavoq.

Tamannalu pissutigalugu inuit Kalaallit Nunaannit assersuutigalugu Danmarkimut nuuttarput. Ilisimavarput, tamanna nutaarsiassaanngilaq.

Soorunami tamatta pissutsit pitsaasumik ingerlanneqarnissaat kissaatigaarput, qanorli pisoqarnissaa ilimagisinnaavarput?

Isumaqarpunga kiffartuussineq maannamut atuuttoq, taannaasoq anguneqarsinnaasoq. Immaqa siunissami sungiunniartariaqarparput oqassalluta suliaq ingerlalluaqaaq, qanoq isorartutigisumik najugaqarnerput, taamatullu najugaqarnitta attatiinnarnissaa qanoq akisutigisoq aamma sulisuvut qanoq amerlatigisut atorsinnaagivut amigaatiginerlutigilluunniit eqqarsaatigissagaanni.

Danmarkimi kiffartuussinerup assinganik pitsaassusilimmik, kiffartuussisoqarnissaa naatsorsuutigissavarput? Imaluunniit siuaasavut assigalugit annikinnerusumik kiffartuunneqassaagut? Taamatut oqarninni qinerneqaqqinnissara naatsorsuutigisinnaanngilara, isumaqarpungali periarfissaasut atorlugit Kalaallit Nunaat naammaginartumik kiffartuussisoq.