Kalaallit Nunaat pillugu isumaqatigiissut oqaluttuarisaanermi pigisanik niuernerit annersaattut taavaa

USA-p præsidentiata, Donald Trump-ip, illersornissaq isumannaallisaanissarlu pillugit isumaqatigiissut qanittumi USA-p, Kalaallit Nunaata Danmarkillu atsioqatigiissutigisaat taagorpaa oqaluttuarisaanermi pigisanik niuernerit annersaattut.

Tamanna pivoq qinersisartunik ataatsimeeqatiginninnermi Dalton-imi, amerikap naalagaaffiisa ilaanni Georgiami ingerlanneqartumi.

- Qanoq isumaqarfigaasiuk isumaqatigiissut, Kalaallit Nunaat pillugu naammasseqqammigara? Akeqanngitsumik pissarsiaraarput.

- Ilimanarpoq oqaluttuarisaanermi pigisanik niueqatigiinnerit annersarisimassagaat, amerikamiut præsidentiat oqalugiarnermini oqarpoq.

Trump Georgia-mi tikeraarpoq Republikanerit qineqqusaarnerannut peqatataalluni, piffissallu qiteqqunnerani qinersinissaq pissaaq novemberip pingajuanni.

Trump arlalissuariarluni oqartarpoq, USA-p kissaatigigaa Kalaallit Nunaata nakkutigilernissaa pigilernissaalu, Kalaallilli Nunaat naalagaaffeqatigiinnerip ilagivaa, taannali naapertorlugu Kalaallit Nunaat USA-p isumannaallisarneqarneranut aalajangiisuusumik inissisimasoq.

Septembarip naalernerani USA, Kalaallit Nunaat aamma Danmark illersornissamut isumannaallisaanissamullu isumaqatigiissummik nutaamik atsioqatigiipput Kalaallit Nunaannut tunngatitaasumik aammalu isumaqatigiinniarnerit sivisuumik ingerlanneqareernerisa kingunerisaanik.

Atsioqatigiinneq pivoq New York City-mi FN-ip illorsuani, Donald Trump-ip FN-ip ataatsimeersuarneranut atatillugu ammaanersiornermi oqalugiareernerata kinguninngua.

Isumaqatigiissut naapertorlugu ilaatigut USA Kalaallit Nunaanni sakkutooqarfinnik nutaanik marlunnik pilersitsisinnaalerpoq. Maanna USA ataatsimik Kalaallit Nunaanni sakkutooqarfeqarpoq, taannalu tassaalluni Pituffik Space Base.

Isumaqatigiissummittaaq amerikamiut qaartartunut missilinut llersornissamut pilersaarutertik Golden Dome Kalaallit Nunaanni pilersissinnaagaat ilaavoq. Aaqqissuussineq taanna iluaqutigalugu qaartartunut missililinut aammalu droninut qaartartunik usisusunut illersuutaasussatut pilersaarutaavoq.

Trump qinersisartunik isumasiuinerni pitsaanngitsumik inissisimavoq, illuatungaanilu Demokraterne Republikanerinut sanilliullugit pitsaanerusumik piffissap qiteqqunnerani qinersinermi ajugaanissaminnut periarfissaqarput - pingaartumik Repræsentanternes Hus-imi (Amerikami Inatsisartut aappai, aaqq.).

Tamanna qularnarneruvoq Senatet-mut (Amerikami inatsisartut siulliit, aaqq.) tunngatillugu. Maanna Trumpip repuplikanereqatai Inatsisartuni taakkunani marluusuni amerlanerussuteqarput.

Qineqqusaarnermi Georgiami ingerlanneqartumi Trump aamma Iranimut sorsunneq pillugu saqqummiussaqarpoq Venezuelamilu pisut eqqartorlugit.

Venezuela-p præsidenterisimasaa ukioq manna januarimi Nicolás Maduro taassumalu nulia, amerikamiut sakkutuuisa immikkut suliaqartinneqartartut angerlarsimaffianni Venezuela-p illoqarfiisa pingaarnersaanni, Caracas-imi tigusarivaat.

Taakku ilaatigut pasineqarput USA-mut ikiaroornartunik kokaininik tonsikkaanik eqqussueqataasarsimasutut maannalu New York-imi eqqartuussaanissartik utaqqvaat.

Trump-ip isertuunnikuunngilaa, Maduro peerseriarlugu amerikamiut uuliasiortitseqatigiiffii Venezuela-p uuliaataanik qalluisinnaalernissaat anguniagarigini.

RITZAU