Kalaallit Nunaat pissutigalugu Trumpip Danmarki akitsuusiiviginiarpaa

Nioqqutissat Danmarkimeersut Europamilu nunanit allaneersut arlallit Kalaallit Nunaat pillugu pissutsit patsisigalugit februaarip aallaqqaataanit 10 procentimik akitsuusiivigineqassapput.

Taama USA-p præsidentia Donald Trump inuinnaat naapeqatigiittarfiutimini Truth Socialimi arfininngornermi allappoq.

Nunat allat tassaapput Norgi, Sverigi, Frankrigi, Tysklandi, Tuluit Nunaat, Hollandi Finlandilu.

Juunip aallaqqaataani 2026-mi akitsuut 25 procentinngorlugu annertusineqassasoq, Trump allappoq.

Akitsuut Amerikamiut Kalaallit Nunaannik ”piginnittuulernerat” pillugu isumaqatigiissuteqarnissap tungaanut atuutissasoq, Trump allappoq.

- USA-p niuerneq manna ukiut 150-t sinnerlugit iluatseriartaraluarpaa. Præsidenterpassuit misiliisimapput – pissutissaqarluarlutik – Danmarkili itigartitsiuarsimavoq, præsidenti allappoq.

Kalaallit Nunaata Kinamit Ruslandimillu, ”qeqertamik tiguaarusuttunik” navianartorsiortinneqarneranik Trump arlaleriarluni oqartarpoq.

- Nunarsuarmi eqqissineq pineqarpoq, Amerikamiut præsidentiat allappoq.

Nioqqutissat nunanit EU-meersut arlallit Amerikamiunit akitsuuserneqareerput. EU USA-lu 2025-mi juulimi EU-mit nioqqutissianik amerlanernik USA-mut eqqunneqartunut ataatsimut akitsuutip qaffasinnerpaaffianik 15 procentimik aalajangersaasumik isumaqatigiissuteqarput.

Amerikamiut præsidentiata akitsuusiissutit maanna oqaatigineqartut qanoq akitsuutit pillugit isumaqatigiissutaareersunut kinguneqarnissaat itisilinngilaa.

Arfinngornermi Danmarkimi Kalaallillu Nunaanni USA-mut Donald Trumpillu Kalaallit Nunaannik nakkutilliilernissamik kissaataanut akerliussutsimik takutitsisoqarnerata peqatigisaanik Trump oqariartuuteqarpoq.

Sapaatip akunnerata ingerlanerani nunanut allanut ministeri Lars Løkke Rasmussen (Moderaterne) Nunanullu allanut naalakkersuisoq Vivian Motzfeldt (S) USA-p vicepræsidentia nunanullu allanut ministeria ataatsimeeqatigiartorlugu Washington D.C.-mut angalapput.