Kalaallit Nunaat pillugu ataatsimiititaliami siulittaasoq Aaja Chemnitz, naalakkersuisut ammip qalipaataa tunngavigalugu nikassaanermut iliuusissatut pilersaarutaannut siorna saqqummiunneqartumut atatillugu kalaallit pisinnaatitaaffii pillugit tusarniaanermik aallartitsivoq.
Tusarniaanermi kulturikkut oqaatsitigullu pisinnaatitaaffiit sammineqarput, aaqqiissutissallu suut siunissami iluaqutaasinnaanersut aamma eqqartorneqarpoq.
Kalaallit Nunaat pillugu ataatsimiititaliami siulittaasoq Aaja Chemnitz, naalakkersuisut ammip qalipaataa tunngavigalugu nikassaanermut iliuusissatut pilersaarutaannut siorna saqqummiunneqartumut atatillugu kalaallit pisinnaatitaaffii pillugit tusarniaanermik aallartitsivoq.
Tusarniaanermi kulturikkut oqaatsitigullu pisinnaatitaaffiit sammineqarput, aaqqiissutissallu suut siunissami iluaqutaasinnaanersut aamma eqqartorneqarpoq.
Isumaginninnermut ineqarnermut ministeri Sophie Hæstorp Andersen (S), ICC-mi siulittaasoq Sara Olsvig, Marie Kahlig Aarhusimi Kalaallit Illuutaannit, Uagut-mi siulittaasoq Julie Rademacher, Inuit Pisinnaatitaaffii pillugit Ilisimatusarfimmi pisortaq Louise Holck aamma Tikiusaamiit Ivalo Lyberth kiisalu Peqatigiiffik Inuit.
Isumaginninnermut ineqarnermullu ministeri Sophie Hæstorp Andersen tusarniaanermi siullertut oqalugiarpoq, kingornali ingerlagami taamaalilluni ataatsimiittarfimmeersut apeqquterpassui tusaanaanngilai.
Assi: Trine Juncher Jørgensen
Ministerip ingerlanera ataqqinninnginnerusoq
Isumaginninnermut ministerip nammineq oqaaseqareersimatsiaannarluni ingerlanera, taamaalillunilu apeqquterpassuarnik isornartorsiuisunik, ilaatigut inissaqarniarnerup ilungersunarneranut meeqqanillu angerlarsimaffiup avataanut inissiinermi angajoqqaajusinnaanermut misissuutit suli atorneqartarnerinut tunngasunik, tusannginnera arlalinnit ajuusaarutigineqarpoq.
– Ministerip tusarniaanermik aallartitseriarluni qimagutiinnarnera ataqqinninngitsuliorneruvoq, Margrete Johansen kingusinnerusukkut oqarpoq.
Laila Berthelsen, illersuisi MAPI-milu siulittaasuusimasoq, tusarniaanerup nalaani apeqqutinik pingaarutilinnik arlalinnik apeqquteqarpoq. Ministerimut Sophie Hæstorp Andersenimut apeqquteqarnissap periarfissaannginnera inuppassuit assigalugit uggoraa.
Assi: Trine Juncher Jørgensen
Anaanaasup meeqqallu angerlarsimaffiat kalaallinut ilaqutariinnut naleqqussagaq
Laila Berthelsenip, illersuisip peqatigiiffimmilu MAPI-mi siulittaasuusimasup, pingaarutilinnik apeqquteqarnermi ministerimit tusaaneqannginnera aamma uggoraa.
– Ministerip ataatsimiittarfimmut iserluni apeqqutinik akissuteqarsimannginnera tupigusuutigaara. Ilaqutariippassuit angerlarsimaffiup avataanut inissiisoqartillugu ikiorserneqarnissaminnut periarfissat suunersut nalusarlugillu
– Anaanaasulli meeqqallu angerlarsimaffiannik ilaqutariinnut kalaallinut immikkut siunertalimmik pilersitsinissaq eqqarsaatigineqarmat tusarakku nuannaarutigaara, taamaalilluni sulisut akornanni kalaallisut oqalussinnaasoqassaaq, tamannalu pingaaruteqarluinnarpoq, Laila Bertelsen tusarniaanerup kingorna oqarpoq.
Aaqqiissutissanik siunnersuutit pitsaasut
Camilla Siezingip Paninnguaq Falck Petersenillu aaqqissuussaq pitsaasutut isigaat, aamma kalaallit assigiinngisitsineq misigisaat aaqqiissutissarsiniarlugu alloriarnertut isigivaat.
– Suliap aallartissimasup nanginneraa. Inuiaqatigiinni assigiinngitsunik suliaqartut qaaqquneqarmata pitsaasuusoq isumaqarpunga. Assigiinngitsunik isummertoqarlunilu aaqqiissutissanut siunnersuutit pitsaasut saqqummiunneqarput. Aamma tusarnaartut isornartorsiuillutik apeqquteqarput, tamannalu aamma pitsaasuuvoq, Camilla Siezing, Inuit peqatigiiffianni siulittaasoq tusarniaanerup kingorna oqarpoq.
Camilla Siezing Paninnguaq Falck Petersenilu pingasunngornermi Christiansborgimi tusarniaanermut najuuttut ilagaat.
Foto: Trine Juncher Jørgensen
Kalaallisut ilinniarnissamut ilinniarteqqinnermullu periarfissat amerlanerusut, Kalaallit Nunaanniit Danmarkimut nuuttut qallunaatut ilinniarnissaannut periarfissaat pitsaanerusut ilaatigut siunnersuutigineqarput. Taamatuttaaq oqalutseqarneq pitsaanerusoq – innuttaasunik kalaallinik sullissisunut saaffiginninnerusoq kissaatigineqarpoq.
– Politikerit isummersorneqarlutillu isumassarsisinneqarput. Oqaloqatigiinneq annertunerusariaqartoq isumaqarpunga. Paasisaqarnerunissamut ataqqeqatigiinnermullu tamanna iluaqutaavoq. Aamma kulturimut aningaasaateqarfiup pilersinnissaa soqutiginartippara, Paninnguaq Falck Petersen oqarpoq.
– Tamat naalakkersueqataaneranni isornartorsiuisoqartarnera peqqinnartorujussuuvoq, angerlarsimaffiullu avataanut inissiinermut tunngatillugu aaqqiagiinngissutit suli suliarineqartut amerlasuut nalunngilara, Aaja Chemnitz tusarniaanerup kingorna oqarpoq.
Apeqqutit pingaarutillit ministerimut nassiunneqassasut
Ministerit tusarniaanermut aallaqqaataaniit naggataanut peqataaneq ajornerat nalinginnaasoq, apeqqutillu pingaarutillit soorunami ministerimut ingerlateqqikkumaarlugit Aaja Chemnitz tusarniaanerup kingorna oqarpoq.
– Tamat naalakkersueqataaneranni isornartorsiuisoqartarnera peqqinnartorujussuuvoq, angerlarsimaffiullu avataanut inissiinermut tunngatillugu aaqqiagiinngissutit suli suliarineqartut amerlasuut nalunngilara. Ministerit tusarniaanerup ingerlanerani ingerlasarnerat aamma nalinginnaavoq. Peqataanerali nuannaarutigaara, soorunamilu apeqqutit isornartorsiuisut taassumunnga ingerlateqqissavagut.
