Kallas: EU-mi siuttut Ruslandimut pillaatisiassanik nutaanik piumasaqartut

EU-mi siuttut Ruslandimut pillaatisiassaata 21-issaanik aalajangersaapput.

Taama oqarpoq EU-p nunanut allanut tunngasunut pisortaa Kaja Kallas Cypernimi EU-mi ilaasortat ataatsimiinnerisa ulluisa aappaanni.

- EU-p Ukrainemut taarsigassarsisitsinera Ruslandimullu pillaatisiassatut aalajangersakkat 20-ssaat akuerineqareerput.

- Maanna naalagaaffiit naalakkersuisullu siuttui Ruslandimut pillaatisiassat 21-ssaat atuutilersinniarlugu kimigiiserput. Tamanna Ruslandimut ersarissumik nalunaajaataavoq uagutsinnit sivisunerusumik pinertusaarsinnaannginnerannik takussutissiisoq, Kaja Kallas oqarpoq

EU-mi naalagaaffiit naalakkersuisullu siuttui peqatigalugit Ukrainep præsidentia Volodymyr Zelenskyj sisamanngornermi nereqatiginerata kingorna Kallas taama oqarpoq.

Ukraine ukiuni marlunni tulliuttuni 90 milliarder euronik ikiorserneqarumaarnera Ruslandillu uuliamik avammut tuniniaanera pillaatisianik nutaanik sukateriffigineqarnissaa Zelenskyjip nuannaarutigisinnaavaa.

Iliuuseqarnerusariaqarpugulli, Kaja Kallas oqarpoq.

- Maannakkut killiliussaq aappalaartoq, pillaatisiassanik unitsitsineq, misissoqqissaassavarput, oqarpoq.

EU-mi nunat Ungarnimi ministeriunerup Viktor Orbánip qinersinermi ajorsarnerata kingorna ineriartorneq ingerlaannaq aallarteqqinniarsarigaat, Kallassip erseqqissarpaa.

Orbánip EU-mit taarsigassarsiassat aamma Slovakiap Ruslandimut pillaatisiarineqarnera sivisuumik akornusersorpaa.

Apriilip aqqaneq-aappaanni Viktor Orbán qinersinermi ajorsarmat Bruxellesimit neriuutigineqarpoq siunissami Europap Ukrainemut tunngatillugu ataasiussuseqarnerunissaa.

/ritzau/