Kallerup innerata qaminnera, biilerluni ajutoorneq imigassarsorsimallunilu biilerneq

Sermitsiap sapaammi ullaakkut Nuummi unnuakkut kallerup innerata qamittoornera tusagaqarfiginiarlugu, Kalaallit Nunaanni Politiit attaveqarfigai.

Politiit kallerup inneranik qamittoornermut atatillugu immikkut ittumik ilungersunartorsiorsimanngitsut, pigaartut pisortaata Aputsiaq Hansenip oqaluttuaraa:

- Innuttaasut ataasiakkaat normumut allamut sianerlutik politeeqarfimmulluunniit ornigullutik uatsinnut attaveqartarnerisa saniatigut, suut tamarmik nalinginnaasumik ingerlapput.

- Ataatsimut isigalugu nalinginnaasumik ingerlatseqqilerpugut, taanna ilanngullugu oqarpoq.

Nuummi kallerup innerata qaminnerani Nuuk taartuinnanngortoq

Arfininngornermi unnukkut aqqarngup qeqqata missaanni Nuummi kallerup innera qamittoorpoq. Qamittoorneq Utoqqarmiut Kangerluarsunnguani sakkortuumik anorlernera pissutigalugu pisoq, Nukissiorfiit ilisimatitsissutigaat, anorillu Nukissiorfiup kallerup inneranut aqqutaani ajutoorneq nassataraa.

Unnuakkut ataatsip qaangilaarnerani ajornartoornermi kallerup inniliummit illoqarfiup pilersorneqarnera aallarteqqinneqartoq, tamannalu immikkoortukkaartumik pissasoq, Nukissiorfiit ilisimatitsissutigaat.

Nalunaaqutaq tallimanut tanneq arfineq marluk illoqarfik tamarmi innaallagissamik, imermik, kiassarnermillu pilersorneqaqqilersoq Nukissiorfiit nalunaarutigaa.

Imigassartorluni biilersimasutut pasineqartoq biilerluni ajutoortoq

Imminut toqunnissamik siorasaarinerit ajoraluartumik amerlasimasut, pigaartut pisortaata ulloq unnuarlu pisunut allanut ataatillugu oqaluttuaraa.

Oqarasuaatikkut siunnersuisarfik Tusaannga oqaloqateqarnissamik pisariaqartitsinermi atussallugu naapertuussinnaasoq innersuussutigaa. Oqarasuaatikkut siunnersuinermi kinaassuseq isertuunneqartarpoq, 801180-mik normoqarluni ullorlu unnuarlu ammasarluni.

Arfininngornermi unnukkut nalunaaqutaq arfineq marlunut tanneq qulinngulersoq Ilulissani biilerluni ajutoortoqarneranik nalunaaruteqartoqarpoq, tassanilu biilertup biilit allat aporpai, ingerlatsisorlu aalakoorneranik pasineqarpoq.

Politiit ornigullutik biilertoq tigusaraat, taannalu aaversinnissaa siunertaralugu tigusarineqarpoq. Ajutoornermi inunnik ajoqusertoqanngilaq.

Nuummittaaq biilertoq imigassartorsimaneranik pasineqartoq

Aamma Nuummi politiit biilertoq imigassartorluni biilertutut tigusaraat, pigaartullu pisortaata tassunga atatillugu imigassartorsimagaanni biilit qimaannarneqartarnissaat sakkortuumik innersuussutigaa:

- Aalakoorluni biilernermi ajutoorujussuartoqarsinnaavoq. Biilertoq nammineq, ilaqutai, aqqusinikkut angallattut allat ajutoorsinnaapput, taamaammallu biilit qimaannarneqartassapput, Aputsiaq Hansen oqarpoq.