Kangaamiuni suliamut tunngatillugu eqqartuussineq: Unnerluutigineqartut marluk toqutsisimasutut pinngitsuutinneqarput

Eqqartuussiveqarfik Qeqqa Kangaamiuni angutit marluk angummik 49-nik ukiulimmik toqutsisimasutut oktobarimi 2025-mi unnerluutigineqartut pingasunngornermi eqqartuuppai.

Unnerluussisussaatitaasut piumasaraat unnerluutigineqartut minnerpaamik ukiuni qulingiluani pineqaatissinneqarsimasunut inissiisarfimmiittussanngortinneqassasut, Maniitsumili eqqartuussivimmi taama pisoqanngilaq.

AAMMA ATUARUK

Arnaq 43-nik ukiulik toqutsisoqarsimaneranik suliami Nunatta Eqqartuussisuuneqarfianit iperagaasoq

Angutit marluk toqumik kinguneqartumik nakuusersimasutut eqqartuunneqarput, aappaa ukiuni pingasuni qaammatinilu arfinilinni pineqaatissinneqarsimasunut inissiisarfimmiittussanngortinneqarpoq, aappaalu pinngitsuutinneqarluni.

Angutit taakku marluk eqqartuunneqannginneranni tigummigallarneqarput allanillu unnerluutigineqaratik.

Eqqartuussissuserisoq Kirsten Birch angummut 43-nik ukiulimmut nakuusersimasutut eqqartuunneqartumut illersuivoq:

- Sullitara pillugu oqiliallassimaqaanga, isumaqaramalu eqqartuussivik uppernarsaatit tunngavigalugit eqqortumik aalajangiisoq.

- Sullitama nakuusersimanerminik toqumik malitseqartumik nassuerpoq, taamaattumillu pillarneqarnissani akueraa, Kirsten Birch oqarpoq.

Nakuuserfigineqartoq arlaleriarluni unatarneqarpoq nalikkaavilu innarlerneqarlutik.

Suliarli suli naammassinngilaq, unnerluussisussaatitaasup angummut nakuusersimasutut pineqaatissinneqartumut eqqartuussut ingerlaannaq Nunatta Eqqartuussivianut suliareqqitassanngortippaa.

Aammattaaq unnerluussisussaatitaasoq angummut allamut eqqartuussutip suliareqqitassanngortinnissaanik eqqarsaatiginneqqissaarnissamut piffissalerneqarpoq ullullu 14-it ingerlaneranni aalajangiisoqassaaq.