Kangerlussuarmi innuttaasut suli ikiliartortut
Kangerlussuarmi innuttaasut ukiup ataatsip ingerlanerani 29 procentinik ikileriarsimasut kisitsisit nutaat takutippaat. Nuna tamakkerlugu innuttaasut amerlassusaat siorna piffissap taamaalineranut sanilliullugit aalaakkaapput, Nuummili amerliartorput.
Nuummi mittarfiup siorna ammarneqarnerata kingorna nunaqarfik mittarfeqarfiusoq suli qimagarneqarpoq.
Assi: Jesper Hansen
Kangerlussuaq suliffippassuit peerneqarpata eqqugaassasoq, tamannalu nunamut allamut nuuttoqalerneranik kinguneqassasoq Kalaallit Nunaanni qitiusumik angallannermi Kangerlussuarmiit Nuummut nuunnissamik aalajangiinermut atatillugu naatsorsuinerit takutippaat.
Nunaqarfik Nuummi mittarfiup 2024-mi novembarimi ammarneqarnerata kingorna suli inuerukkiartortuartoq Naatsorsueqqissaartarfiup kisitsisaataasa nutaat takutippaat.
Nunaqarfik 2024-mi qaammatit kingulliit pingasut 533-nik inoqarsimavoq. Kisitsisit 2025-mi qaammatini pingasuni kingullerni 376-inut ikileriarsimapput. Aallaavimmiit 29 procentimik appariartoqarsimavoq.
Kangerlussuarmi innuttaasut 2023-mi qaammatit pingasut kingulliit aallarnerfigalugit qaammatit pingasukkaarlugit allanngorarnerat takussutissiami ataani takuneqarsinnaavoq.
Grafik: Grønlands Statistik
Nuuk alliartortoq
Nuna tamakkerlugu isigalugu inuit amerlassusaat aalaakkaavoq.
Naatsorsueqqissaartarfik naapertorlugu inuit 56.699-it oktobarip aallaqqaataani nunatsinni najugaqarput, tassa ukiup siulianut sanilliullugu 37-nik amerlanerullutik. Inuilli Kalaallit Nunaanni najugaqartut inunngorsimasullu siornamut sanilliullugit 82-inik ikinnerupput.
Kalaallit Nunaanni najugaqarlutillu inunngorsimasut katillugit 49.657-iupput.
Naatsorsueqqissaartarfik naapertorlugu Kommune Kujallermi, Avannaata Kommuniani Qeqqatalu Kommuniani innuttaasut amerlassusaat aalaakkaavoq. Qeqertalimmi innuttaasut 2,2 procentimik ikileriarput, kommuunimili illoqarfiit pingaarnersaasa inissisimaffigisaani innuttaasut amerliartorput.
Minnerunngitsumik Nuummi maanna 20.281-inik inoqartumi, siorna ullormut tassunga naleqqiullugu 397-inik amerlanerusunik innuttaasoqarpoq:
- Nuummi innuttaasut amerliartortuarsinnarput, nunaqarfinnili minnerni ikiliartornerupput, pingaartumik 2025-mi, Naatsorsueqqissaartarfik allappoq.
