PINNGITSUUISINNAAJUNNAARSIMASUNIK KATSORSAANEQ
Katsorsaavik Nuup matunissaanik oqaluttuarsiat ilumuunnginneragaasut
Inatsisartuni ilaasortaq Naalakkersuisunut apeqquteqarpoq "Katsorsaavik Nuuk marsip 31-ani 2026 matuppat" qanoq iliuuseqassanersut. Kisianni atornerluinermik katsorsaavittut suliffeqarfik namminersortoq Katsorsaavik Nuuk ilumuunnginneraavoq katsorsaaviup matunissaanik pilersaaruteqartoq.
Pinngitsuuisinnaajunnaarsimasunik katsorsaaviup Katsorsaavik Nuuk-p piginnittua, Grethe Kramer Berthelsen, Sermitsiarmut naqissusiivoq Katsorsaavik Nuuk matunissaminik pilersaaruteqanngitsoq.
Asseq toqqorsivimmit: Leiff Josefsen
Inatsisartuni ilaasortap paragraf 37 naapertorlugu apeqqutimini paasisaqarusuppoq, Katsorsaavik Nuuk 2026-mi marsip 31-ani katsorsaanermik unitsitsippat, atornerluisunik
katsorsaaneq manna tikillugutut ingerlaannarsinnaanissaa Naalakkersuisut qanoq
qulakkeerniarneraat.
Tassunga ilanngullugu inatsisartuni ilaasortap apeqqutigaa, Katsorsaavik Nuuk matutinnagu atornerluisunik katsorsaanerup siunissaa pillugu, matumani
aaqqissuussineq, nuna tamakkerlugu periarfissiinissaq, aningaasalersuinerlu ilanngullugit,
Naalakkersuisut ataatsimut pilersaarummik saqqummiussissamaarnersut.
Katsorsaavik Nuuk matulinngilaq
Inatsisartunili ilaasortap apeqquteqartup Katsorsaavik Nuuk-p matunissaanik suminngaaniit ilisimatinneqarsimanera pillugu, katsorsaavimmi piginnittup, Grethe Kramer Berthelsenip, tupigusuppoq:
- Naluara apeqquteqartoq suminngaaniit paasitinneqarsimanersoq matusussanngornerarluta, tassami pilersaaruteqanngilagut suliffeqarfitta matunissaanut, Grethe Kramer Berthelsen naqissusiivoq.
Tassunga atatillugu Grethe Kramer Berthelsen oqaluttuarpoq katsorsaavimmut saaffiginnittoqartalersimasoq paasiniarlugu sooq matussanersoq. Aammattaaq suliakkiisartunit, tassami katsorsaavik Namminersorlutik Oqartussat isumaqatigiissuteqarfigimmagu Nuummi aamma Tasiilami katsorsaanermik neqerooruteqarnissamik, taamatuttaaq Allorfik aamma inunnik katsorsarneqartussanik Katsorsaavik Nuummut innersuussisarmat.
- Namminersorlutik Oqartussanut isumaqatigiissuteqarpugut, aammalu pisortat pigalugulu ingerlataannut Allorfillu unammillertutut inissisimasaraluarluta, taamaattoq Allorfillu aamma suleqatigiippugut, suleqatigiinnerpullu pilersaarutit malillugit ingerlavoq, Grethe Kramer Berthelsen erseqqissaavoq.
Naalakkersuisut aamma ilisimasaqanngillat
Peqqissutsimut inunnullu innarluutilinnut Naalakkersuisoq, Anna Wangenheim (D) akissummini erseqqissaavoq, Naalakkersuisut, Kalaallit Nunaanni peqqinnissaqarfik, tassungalu ilanngullugu Allorfik, ilisimatinneqarsimanngitsut suliffeqarfiup namminersortup, Katsorsaavik Nuuk-p katsorsaanermik unitsitsissanngorsimaneranik.
Wangenheim aamma akissutimini oqaluttuarpoq neqeroortitsinermi kingullermi, apriilip aallaqqaataani 2025-mi suliassat suut Katsorsaavik Nuuk-ip neqeroorutigisimanerai pissarsiaralugillu:
- Tamanut ammasumik neqeroortoqareernerata kingorna, nuna tamakkerlugu aggertunik Nuummukartitsilluni katsorsaanermik suliaqarneq Katsorsaavimmut tunniunneqarpoq, taamatuttaaq Tasiilami sumiiffimmi katsorsaasarneq apriilip aallaqqaataani 2026-mi atuutilertussaavoq, maannakkut isumaqatigiissutit atorunnaarpata, Anna Wangenheim Inatsisartuni ilaasortamut akissutimini ilaatigut nassuiaavoq.
