Kiisami isumaqatigiittut: Ilinniartitsisut aningaasarsiaqarnerulissapput pitsaanerusunillu atugassaqalerlutik

Isumaqatigiissut nutaaq apriilip aallaqqaatanit 2025-miit 2029-mi marsip 31-ata tungaanut atuutissaaq. Isumaqatigiissutip ataatsimut bruttoramia 9,07 pct.-iulluni. Naalakkersuisut nittartakkaminni taama nalunaarput.

Akissarsiat nalinginnaasumik qaffannerisa saniatigut tapit assigiinngitsut qaffariaateqarnissaat isumaqatigiissutigineqartunut ilaavoq. Aammattaaq MISI-PPR-imi sulisut atugarisaat pitsanngorsaavigineqassapput. IMAK-imi siulittaasoq Elna Heilmann kattuffiup Facebookikkut qupprnerani ima allappoq:

- Oqaatigisinnaavarput tunngaviusumik akissarsiat agguaqatigiisillugu 13 %-it missaannik qaffattussanngormata aammalu IMAK-ip Socialfondia pilersinneqartussanngormat. Pikkorissartarnerit ilinniaqqittarnerillu ukkatarineqarnerunissaat aamma isumaqatigiissutaavoq.

Isumaqatigiissut ilinniartitsisunik sulisussarsiornermi iluaqutaassasoq, aammali sulisooreersut paariinnarnissaanut aqqutissiuillunilu meeqqanik inuusuttunillu immikkut pisariaqartitsisunut suliniuteqarnermi pitsanngorsaaqataassasoq illuatungeriit erseqqissarpaat

Sulinermi atugassarititat pitsaanerusut

Ilinniartitsisutut ilinniarnerminni naammasserlaat atorfinerlaallu mentoreqartalernissaat, piffissap suliffiusup ullullu sulinngiffeqarfiusut pillugit ersarinnerusunik sinaakkuteqalernissaq, ilinniaqqinnissamut pitsaanerusumik periarfissaqalernissaq aamma suliner illuatungeriit isumaqatigiissutaannut aamma suliffimmit peqquteqartumit stressilertarnerup pinaveersaartinneqarnissaa illuatungeriit isumaqatigiissutaannut ilaavoq.

Ilinniartitsisut aningaasarsiarilerumaagassamik atorfininnerminnilu atugassarititaasut qanoq ikkumaarneri paasissallugit piffissami sivisuumi utaqqisimavaat.

Isumaqatigiissutip inernera maanna IMAK-ip ilaasortaanit taasissutigineqassaaq sulisitsisullu tungaanit akuersissutigineqassalluni.

- Tullinnguuppoq isumaqatiginninniarnerni angusaasut ilaasortanut saqqummiunneqarlutillu taasissutigitinneqarnissaat, Elna Heilmann IMAK-ip Facebookimi quppernerani taama allappoq.