Kikkut tamarmik kalaallit piinik paarlaaqateqarusuttut

Nuummi Spejderineersut 34-t maannakkorpiaq Roskildep eqqaani Hedelandimi spejderit tammaarsimaarneranni peqataapput. Tammaarsimaarfik 30.000-inik peqataaffigineqartoq angisoorujussuuvoq — 75 hektarit, tassa arsaattarfiinniit 100-t angeqqataat, akianiit akianut 3 kilometerinik takitigisoq. Taamaammat ullormut kilometererpaalunnik pisuttoqartarpoq.

Nuummi Spejderit inissisimaffiat tammaarsimaarfiup kitaatungaaniikkaluartoq alapernaatsuniit ullut tamaasa orninneqartarput. Kalaallimmi spejserit kikkut tamarmik pilerigisaannik peqarput.

Kalaallit spejderitut uppernarsaataat, ilisarnaataat spejderillu qungasequtaat pilerigineqartorujussuupput. Spejdererpassuit nunanit tamalaaneersut tammaarsimaarnerminni paarlaasseqatigiittarneq nuannarineqartorujussuuvoq – frimærkinik katersuinermisut nunat mikinerit piumaneqarnerpaasarnerannut sanilliunneqarsinnaavoq.

- Qujanartumik piareersarnikuugatta, Simon Borgert Olesen, ukiut 30-t sinnerlugit spejderiusimasoq, oqarpoq.

Taamaattumik uppernarsaatinik tammaviutsussanillu amerlanernik atorsinnaasatsinnik sanatitsinikuuvugut. Ajoraluartumik tammaarsimaarnerup arfininngormat aallartinnerani suli tikinngillat, taamaammallu amerlasuut kingusinnerusukkut aggeqqeqqunikuuagut.

- Tamannali soqutaanngilaq, spejderimmi nunanit allaneersut peqatiginerat misigisassanut ilaavoq inuusuttut puigunaatsorfigisassaat.

Inuusuttut inuusuttunik ilinniartitsisut

Spejderiunermi pigisat pingaarnerpaanngillat, inuttulliuna ineriartorneq pingaartinneqartoq. Spejderit nammineersinnaaneq ilinniarlugulu allanik suleqateqarsinnaanermik ineriartortitsisarput. Periusoq "inuusuttut inuusuttunik ilinniartitsisut" atorneqarpoq, tassanilu meeqqat ukiukitsillutik namminneq iliuuseqarsinnaanerannik akisussaaffimmillu tigusisinnaanerannik ilinniartinneqartarput. Spejderit inersimasunit aqunneqanngillat.

Spejderit suli atualeratik savimmik ulimaammillu atuineq ilinniartarpaat. Namminneerlutik ikumaartitsivimmi nerisassiorsinnaasussaagamik nalunngittariaqarpaat - aamma taammaarsimaarfimmi. Taamaammat ulloq naallugu ikumaartitsisoqartarpoq - atisat pujorsunninnerat angerlareernerup kingorna tammaarsimaarnikuunermut eqqaasitsissutaavoq.

- Qisuit ulimallugit nuannertaqaaq. Nuummi qisunnik peqarpallaanngikkaluarpugut, maanili naammattunik peqarpoq, taamaattumik ulimannermut piffissarujussuaq atortarpara – aamma pikkorifigalugu misigivunga, Emanuel ulimarusaatigaluni oqarpoq.

Nuummi Spejderineersut 34-t Københavnimut sapaatip-akunnerani kingullermi sisamanngornermi tikipput. Københavnimi ullualunni takornariarput, tassani Christiansborg, Amalienborg aamma Rundetårn alakkarneqarlutik.

Roskildemut arfininngormat tammaarsimaarfimmukaapput, tassanilu sapaatiuppat tungaanut najugaqassapput — ullunilu marlunni vandrehjemmimi qasuersaariarlutik Nuummut marlunngorpat uterniarput.

Sammisassarpassualik

- Tammaarsimaarnermi ullut siulliit marluk nappartiterinermut atorneqarput, kingornalu sammisassat aallartinneqarlutik. Ilaatigut pisissertarneqattaassaagut, tamatumalu kingorna Roskildep oqaluffiani arpatsitsissaagut, Simon Borgert Olesen oqarpoq.

- Ullaap tungaani ualikkullu sammisaqartarpugut, piffissallu sinnerani nerisassiortarlutalu spejdereqatigut nuannisaqatigisarpavut.

Nuummi Spejderit Danmarkimi spejderit pisoqaanersaata ilaat, Fynip kujataani Skaarupimi Pionerit, suleqatigaat. Taakku toqqinik nappartitereqatigalugillu atortuminnik avitseqatigaat, taamaalilluni Kalaallit Nunaanniit nassatanik oqimaatsunik nassartariaqaratik - Spejderillu tammaarsimaarfianni ataatsimoorlutik.

- Ajunngitsumik ingerlavoq. Spejderit imminnut ilikkagaqarfigalutillu atortussanik akisuunik akiliinissaraluaq pinngitsoorpoq, Simon Borgert Olesen oqarpoq.

- Spejderit 34-t Danmarkiliarnissaat akisummat Fynimi spejderit suleqatiginissaat silatusaarneruvoq.

Ukiorpassuarni piareersarneq

Nuummi Spejderit angalanissaq ukiorpassuarni piareersarsimavaat. Suliffeqarfinnit assigiinngitsorpassuarnit, Kommuneqarfik Sermersuumit, Naalagaaffiup Sinniisoqarfianit aningaasaateqarfinnillu tapersersorneqarlutik – namminnerlu ilaatigut Nuummi pisuni annerni pølsenik tuniniaanermikkut aningaasarsiortarsimapput.

- Maannakkut maaniippugut, iluatsilluarlunilu. Meeqqat tammaarsimaarfissaq tulliuttoq pillugu oqaluutillattaalereersut tusaavakka – 2030-mi Spejderit Tammaarsimaarfiat minnerunngitsumillu 2031-mi Silkeborgimi spejderit nunarsuarmioqatigiivisa ataatsimeersuarnissaat. Spejderiugatta nunarsuaq tamakkerlugu spejderinut 60 millionit sinnerlugit amerlassusilinnut ilaavugut, silamilu sammisaqaqatigiinnissamik pingaartitseqataalluta, Simon Borgert Olesen oqarpoq.

- Allanik naapitsigaangama nunarsuarmilu suli ikinngutissarpassuaqarnera paasigaangakku piumassuseqarnerulertarpunga.

Tammaarsimaarnerup iluatsilluarnissaa anguniarlugu, spejderit Kalaallit Nunaanneersut Fynimeersullu eqimattanut arfineq-marlunnut agguataarneqarput, taamaalillutik ulluinnarni suliassat paarlakaallutik suliarisarlugit. Tassaapput imertarneq, qisunnik ikumatitamillu ikitsineq, eqqagassanik immikkoortiterineq tunniussinerlu, nerisassiorneq, errorsinermut imermik qalatsitsineq kiisalu erruineq eqqiaanerlu. Eqimattat kingulliit ullormi tassani sulinngiffeqarput.

Neqitaqanngitsunik nerisassiat

Spejderit Tammaarsimaarfianni silap pissusaa immikkut sammineqarpoq, taamaattumillu ullormut nerisassat kissartut neqitaqassanngitsut aalajangerneqarput.

- Tamanna unammillernarpoq. Mattammik aalisakkanillu panertunik nassarnissaat eqqartoraluarparput, inissaqanngillalli. Mannali tikillugu suli uummavugut, William Oscarilu oqaluttuarput. Taakku naatitanik sapaammi kissartutugassanik agguerusaarput - nerisassat neqitaqanngivissut.

Spejderiuneq unammilligassarpassuaqarpoq – maanna aamma neqitaqanngitsunik nerisaqarneq eqqarsaatigalugu – Nuummili spejderit suut tamaasa qungujulallutik naammagalugit atortarpaat. Nutaanillu misigisaqarsimallutik Kalaallit Nunaannut angerlassapput, spejderitullu suut tamaasa angusinnaasutut misigalugit - sinnerinullu ikiorneqarsinnaallutik.

Soorlu Spejderinik pilersitsisup Baden Powellip oqartarneratut: "Spejderi ilimagisaminiit marloriaammik piginnaasaqarput – arnaata ilimagisaaniit quleriaammik annerusunik". Taassuma Tuluit Nunaanni ukiut 100-t sinnerlugit matuma siorna spejderit pilersippai.