KNI-p avannaani nioqqutissat ikilisarai
Upernavimmi innuttaasut Pilersuisumi nioqqutissat assigiinngitsut ikilisimasut malugigaluaraat, KNI-p Namminersorlutik Oqartussanut kiffartuussinissamik isumaqatigiissut suli eqqortittarpaa, Naalakkersuisut siulittaasuat Jens-Frederik Nielsen naqissusiivoq.
KNI-p nioqqutissat piumaneqarpallaanngitsut pisariaqartillugu nalimmassartuarpai, nioqqutissalli tunngaviusut 340-t pinngitsoorani pisiniarfinniittuartariaqarpai.
Toqqorsivimmit assi: KNI
Kiffartuussinissamut isumaqatigiissummi KNI pisiniarfiutiminut minnerpaamik nioqqutissanik tunngaviusunik assigiinngitsunik 340-nik pilersuisussaavoq, aamma ”sullissinissamik isumaqatigiissummi piumasaqaataasut naammassineqarsimaneri Naalakkersuisunit ingerlaavartumik malinnaaffigineqarput”, Naalakkersuisut siulittaasuat Jens-Frederik Nielsen paragraf 37 naapertorlugu Naleqqameersumut Isak Johannesenimut akissummini ilisimatitsivoq.
KNI-p ukiakkut tunisassiaminik tunisaqartarnini nalimmassarsimammagu Upernavimmi innuttaasut pisiniarfimmi nioqqutissat assigiinngitsut ikinnerunerat malugigaluaraat nioqqutissat kiffartuussinissamik isumaqatigiissummi piumasaqaatinut ilaanngitsut pineqarput.
Naleqqussartuarneq
- KNI nuna tamakkerlugu assigiimmik akeqartitsivoq illoqarfiillu aamma nunaqarfiit ataasiakkaat akornanni assigiinngitsunik akeqartitsineq ajorluni, ilisimatitsissutigineqarpoq nunalu tamakkerlugu Pilersuisup pisiniarfiini nioqqutissat tamarmik assigiimmik akeqartut erseqqissarneqarpoq.
- Ingerlatsinerli pitsaanerpaatinniarlugu najukkani ataasiakkaani assigiinngitsunik akikillisaqarsinnaasarpoq. Nioqqutissat nutaat, soorlu naatitat timmisartumik nassiunneqartartut aningaasartuutaasimasut naapertorlugit akii assigiinngisitaarsinnaasarput.
Kalaallit Nunaanni nioqqutissat akii innuttaasunut iluaqutaasussamik tamakkiisumik akikinnerusinnaaneri kissaatiginaraluartoq anguniagaq tamanna oqitsuinnaanngitsoq tassa assartuinermi uninngasuuteqarnermi kingusinnerusukkullu igitsisariaqarnermi aningaasartuutaasartut tassani pineqartut Jens-Frederik Nielsen akissummini allappoq.
Nioqqutissat agguataarneqarnerat unammillernartoq
Nunaqarfinni najugallit illoqarfinnut anginernut nuuttarput, tamannalu KNI-p ulluinnarni nioqqutinik tuniniaaneranut unammillernarpoq.
Namminersorlutik Oqartussat suliffeqarfiutaat nioqqutissanik immikkoortortaqarfimmi unammillernartoq pillugu ukiumoortumik nalunaarusiami 2024/25-moortumi ima allappoq:
„Illoqarfinni najugaqartut amerliartuinnarnerat pissutigalugu nunaqarfinni isorliunerusunilu najugaqartut ikiliartorput. 2001-imiilli ukiumut 10 procentit missaat illoqarfimmit nuuttarput, amerliartorpullu.“
Naligiissitsineq
Jens-Frederik Nielsenip unamminiarnartoq tamanna eqqartorpaa akissumminilu ima naggasiivoq:
- Sineriammi ileqqaartoqarnissaa Naalakkersuisut kissaatiginngilaat, nunatsinnilu innuttaasut sumiluunniit najugaqaraluarunik assigiimmik pineqarnissaat pingaartitaralugu. KNI A/S eqqarsaatigalugu pitsaanerusumik ingerlatseriaasissamik suliaqaleruttorput, taamaaliornikkut sinerissami pilersuineq aalajaatsumik ingerlattuarneqarnissaa anguniarneqarpoq, tamatumalu saniatigut illoqarfinnut nuuttarnerit pisut kiisali niuernerit annikinnerusuniittut tunngavigalugit niuerneq naleqqussarneqartarluni.
