KNQK: Jeff Landrymut qaaqqusissut taamaatinneqarpoq
Takornarialerisup USA-p immikkut aallartitaa Jeff Landry Avannaata Qimussersua 2026-mut qaaqqusinini taamaatikkaa, KNQK tusagassiuutitigut nalunaarummi allappoq.
Assi: Samuel Corum/EPA/Ritzau Scanpix
USA-p immikkut aallartitaa Jeff Landry Avannaata Qimussersuanut 2026-mut peqataaniarluni pilersaaruteqarnera pillugu Kalaallit Nunaanni Qimussertartut Kattuffiat, KNQK, maanna nutaarsiassamik saqqummiivoq.
Takornarialerisut Jeff Landrymik qaaqqusinertik sussaarsimagaat KNQK ilisimatinneqartoq taakku allapput.
- Tamanna KNQK-p tungaaniik toqqissiallaatingalugu tusaatissatut tinguarput, KNQK allappoq.
Jeff Landry Kalaallit Nunaannut marsimi angalaniarluni sapaatip-akunnerani kingullermi nalunaarpoq, folketingimilu ilaasortap Aaja Chemnitzip (IA) Landry qimussimik sukkaniunneq ileqquusoq isiginnaariarniaraa arlaliinniit paasisimallugu tusagassiuutinut arlalinnut oqaatigaa.
Takornariartitsisartup najukkamilu politikerip Kristian Jeremiassenip Landrymut Avannaata Qimussersua takutinniarlugu neqerooruteqarsimalluni siusinnerusukkut uppernarsarpaa. Taanna pineqarnersoq KNQK-p paasissutissiissutiginngilaa.
Aamma qaaqqusissutip taamaatinneqarnera Jeff Landryp Kalaallit Nunaannukarnissaminut marsimi pilersaarutaanut sunniuteqassanersoq ilisimaneqanngilaq.
Jeff Landryp præsident Donald Trumpip Kalaallit Nunaata USA-mit tiguaarusunnera arlaleriarluni aamma oqaatigisareerpaa.
USA-p præsidentiata tullersortaa J.D. Vance taassumalu nulia Usha Vance Kalaallit Nunaannut siorna aamma tikeraarput, taamani Usha Vancep qimussimik isiginnaariartussanngoraluarluni. Tamannali akerliusussutimik takutitsisoqarnerata kingorna taamaatiinnarneqarpoq.
