NUUK
KNR-ip illorsuatoqaa kingumut ikuallattoq
Ualeq manna Nuummi Kissarneqqortuunnguami KNR-ip illorsuatoqaa kingumut ikuallalersimasoq Kalaallit Nunaanni Politiini nakkutilliisut pisortaat, Thomas Jeppesen, oqaluttuarpoq. - Meeqqat inuusuttullu sumiiffimmiissimasut ikuallatsitsisimasullu pasitsaassivugut, taanna Sermitsiamut oqarpoq.
Meeqqat anginerusut inuusuttullu KNR-ip illorsuatoqarsuata qimatap iserfiginissaanut periarfissarpassuaqarput. Illorsuaq arlaleriaqaluni ikuallannikuuvoq, ullumilu aamma ikuallappoq.
Asseq toqqorsivimmit: Leiff Josefsen
Kalaallit Nunaanni politiit qatserisartullu Nuummi pingasunngornermi ualikkut ikuallattumut ornigupput. KNR-ip illorsuatoqarsua Nuummi Kissarneqqortuunnguaniittoq arlalissaanik ikuallalersimasoq qamiteriartorneqarpoq.
- Sumiiffimmi meeqqat inuusuttullu sumiiffimmiissimasut ikuallannermillu aallartitsisimassasut pasitsaassivugut, nakkutilliisut pisortaat Thomas Jeppesen Sermitsiamut oqarpoq.
Sumiiffik akulikinnerusumik nakkutigineqassaaq
Illorsuup taassuma atorneqaranilu inoqanngitsup ikuallannera siullermiinngilaq, illorsuatoqqamullu isersinnaanermut periarfissat arlaqarput.
- Meeqqat inuusuttullu illorsuarmi tassani inoqanngitsumiittarnerat ajoraluartumik qaqutiguunngilaq, illorsuarlu taanna arlaleriarluni ikuallattarpoq. Ullumikkullu pisumi ikitsisilerillutik ikuallatsitsilersoorsimassasut, ikuallalermallu tassanngaaniit qimaasimassasut ilimanarluinnarpoq.
- Politiit tungaanit aqqusinermi nakkutilliilluta angalaartarnitsinni sumiiffik akulikinnerusumik nakkutigissavarput, meeqqat inuusuttullu illorsuarmi tassaniittarunnaassasut neriuutigalugu, nakkutilliisut pisortaat Thomas Jeppesen naqissusiivoq.
