Kommune Kujalleq suli aningaasaqarnikkut ajornartorsiornermit aniguiniarsarivoq - akileraarut qaffattussanngorpoq

Tamanna ilaatigut isumaqarpoq innuttaasut akileraarutitigut procentimik ataatsimik qaffasinnerusumik akiliisariaqassasut, kommunillu inissiaataanni najugaqartut ineqarnermut akiliutaat procentinik pingasunik qaffannerannik naatsorsuutiginnittariaqassasut.

Siusinnerusukkut kommunalbestyrelsiusimasup aalajangerpaa 2024-mi akileraarut procentimik ataatsimik appartinneqassasoq taamaalilluni akileraarutit katillugit 43 procentinngorlugit. Kisianni aalajangiineq atuutilersinneqarpoq aningaasaqarnikkut unammilligassat annertuut aningaasaqarnikkullu aqutsinerup amigaateqarnerata nalaani. 

Aamma Kommune Kujalliup naatsorsuutani erserpoq 2024-mi 29,6 millioninik koruuninik amigartoorfiusoq, naatsorsuutigineqaraluarluni 14,4 millioner koruuninik sinneqartooruteqartoqassasoq. 

Tassunga ilanngullugu kommuni 100 millioninik koruuninik taarsigassarsisariaqarpoq namminersorlutik oqartussanut akileraarutit akilerneqanngitsoorsimasut matussuserniarlugit, kommunilu taarsigassarsiat akilersornissaannik 2026-mi aallartittussanngorpoq.

Tassaapput kommunip aningaasaqarnerani unammillikkat ilaat, kommunalbestyrelsip nutaap kommunimi tamarmi pissutsit misissortariaqalerneranik iliuuseqartariaqarneranillu kommunip aningaasaqarnikkut inissisimanerata attanneqarsinnaasunngortinnissaa anguniarlugu.

Akileraarutit ineqarnermullu akiliutit qaffattussanngortut

Aningaasaqarnermut ataatsimiititaliaq borgmesteri Malene Vahl Rasmussen siuttoralugu akileraarutit procentinik marlunnik qaffanneqarnissaat siunnersuutigisimagaluarpaat. Kisianni missingersuusiornermi isumaqatigiinniarnerit kingorna qaffariaat procentimik ataatsimik qaffanneqassaaq.

- Kommunep aningaasaqarnera suli qajannaatsuunngilaq, tamannalu 2026-mut aningaasaqarnikkut tunngavissat katillugit aqutsinermut, pingaarnersiuisarnermut aaqqissuussinermullu piumasaqaateqaqaaq. 

- Immikkoortunut aningaasaliissutitigut missingersuusiortoqarpoq, katillugit 39,3 millioner koruuninik sinneqartoorfiussasoq, kisianni tamanna aalajangiinernik pingaarutilinnik iliuuseqartariaqarnernillu tunngaveqarpoq aningaasaqarnermut ataatsimiititaliap siunnersuutaanni allassimavoq.

Tassunga ilanngullugu kommunep inissiaatai attartortittakkat, INI A/S-ip aqutai, ukiut ingerlaneranni ineqarnermut akigititat appasippallaarnerat pissutigalugu ingerlatsinermut aserfallatsaaliuinermullu aningaasartuutit matussusiinngitsut 2026-mi 3 procentimik qaffanneqarnissaat siunnersuutigineqarpoq. 

Sipaarniuteqarnissamut pilersaarutit annertuut

Kommunalbestyrelse 2026-miit aningaasaqarnikkut attanneqarsinnaasumik qulakkeerinninnissamut arlalissuartigut pingaarutilinnik aalajangiisariaqalerluni, aningaasaqarnermut ataatsimiititaliap siunnersuutaanni allassimavoq, tassanilu siunnersuutigineqarpoq missingersuusiorneq katillugit 39,3 millionit koruuninik sinneqartoorfiusoq aallaavigineqassasoq.

Taakku saniatigut soraarsitsinissamik, ingerlatsinermik pitsanngorsaanissamik digitaliseerinissamillu, immikkoortortat akimorlugit suleqatigiinnerup nukittorsarnissaanik, politikkikkut suliarineqartussamik sipaarniutinik allattuiffimmik suliaqartoqarnissaa, atuarfiit, meeqqeriviit, sanaartukkat utoqqaallu pillugit aaqqissuussinikkut allannguisoqarnissaa, napparsimalluni sulinngitsoornerup annikillisarneqarnissaanik samminnittoqarnissaa, kiisalu inatsisitigut pisussaaffiusut imaluunniit aningaasaliiffigineqartut kisimik ingerlanneqartarnissaat pillugit ileqqoqalernissaq aallartinneqassapput. 

Aammalu ulluunerani paaqqinnittarfiit akii sunnerneqassapput meeqqanullu sunngiffimmi aaqqissuussinernut atuisarnerannut akiliisoqartalernissaa siunnerfigineqarluni.