Kommune Kujalliup Innovation South Greenland Kujataanilu Sulisitsisut suleqatigiinnissamik isumaqatigiissuteqarfigai

Qaqortumi mittarfiup ammarnera ilutigalugu pingasuulluni isumaqatigiissut kujataani inuussutissarsiornerup ineriartortinnissaa aamma periarfissat nutaat aallaavigalugit suleqatigiinneq nukittunerusoq pilersinniarlugit Kommune Kujalleq, Innovation South Greenland aamma Kujataani sulisitsisut isumaqatigiissusiorput.

Taama Kommune Kujalleq tusagassiuutitigut nalunaarummi allappoq.

Qaqortumi mittarfiup ammarneqarneranut atatillugu Kujataani inuussutissarsiornerup ineriartornissaa naatsorsuutigineqarpoq. Illuatungeriit ataavartumik naapittarnissaat periarfissallu nutaat atorluarniarlugit suleqatigiittarnissaat pilersaarutaavoq.

Isumaqatigiissutip aalisarnermi, piniarnermi, nunalerinermi inuussutissanillu tunisassiornermi, aatsitassarsiornermi, takornariaqarnermi, assartuinermi ilinniartitaanermilu suleqatigiinnikkut ineriartorneq aallaavigaa.

- Pingasuulluta isumaqatigiissuteqarnerput nuannaarutigivara, kujataanilu ineriartortitseqqinnissaq eqqarsaatigalugu aallartiffittut nutaatut isigalugu.

- Ineriartortitsinissarmi eqqarsaatigalugu immitsinnut tikkuartuunnata suleqatigiinneq nukittooq ataatsimoorluta pigissavarput. Taamaattumik isumaqatigiissutitta inerititaqarluarnissaanut isumalluarpunga, borgmester Malene Vahl Rasmussen oqarpoq.

Isumaqatigiissut borgmesterimit, ISG-p pisortaanit Miki Jensenimit aamma Kujaani Sulisitsisut siulittaasuanit Aqqaluk Abelsenimit Qaqortumi kommunalbestyrelsip ataatsimiittarfiani marlunngornermi apriilip 21-anni atsiorneqarpoq.