Kommuneqarfik Sermersooq imermut minguttumut 100 millionit koruunit atorlugit pilersaarusiortoq
Illoqarfiit pingaarnersaanni Sanaartornermut Avatangiisinullu Ingerlatsivik imermut minguttuumut pilersaarummik nutaamik ukiuni arfinilinni tulliuttuni 95,8 millionit koruuninik aningaasaliiffigineqartussamik suliaqarpoq.
Assersuut: Nuummi kuuffiit aqqutaannik puilasulianillu taarsersuineq.
Assi: Kommuneqarfik Sermersooq
Kuuffilersuineq, imermik minguiaaveqarfik, nutarterinissamillu pisariaqartitsineq aamma avatangiisinik nalilersuinerit taakkuupput imermik minguttumik isumaginninnissamut pilersaarusiornermi
illoqarfiit pingaarnersaanni illoqarfinnilu allani inuiaqatigiit
ineriartornerat eqqarsaatigalugu suliarineqartut.
Nuummi Tasiilamilu innuttaasut amerliartuinnarneri ilutigalugit ukiunut arfinilinnut pilersaarusiaq nutarterneqartariaqalerpoq, innuttaasut, takornariat suliffeqarfiillu amerliartortillugit imeq minguttoq annertuisiartuinnartussaammat, avatangiisinullu ajoqutaanngitsumik aaqqiivigineqartariaqarluni.
Nalinginnaasumik aallaavittut imeq minguttoq immamut kuutsinneqariaannaasinnaavoq avatangiisinut sunniuteqanngitsumik, sumiiffiilli ilaanni — ingammik Nuummi — ima annertutigilersinnaalluni allaat ajornartorsiutaalersinnaalluni.
Ukiut 14-it matuma siornagut erngup pitsaassusaanik misissuisoqartoq
Illoqarfiit pingaarnersaanni eqqaanilu imeq ukiut 14-it matuma siornatigut misissorneqarpoq, tassanilu paasineqarluni ingammik Qinngutta Kangerliumarngani Nuutoqqamilu erngup akui inuit inaluarsuaanni bakterianik akoqarpallaartut, taakkunanilu imeq imerneqarpat timminnermik naarlunnermillu malitseqartitsisinnaallutik.
Taamaattumik aqutsisoqarfiup politikerinut inassuteqaammini aamma erseqqissarpaa, erngup pitsaassusia qanoq ineriartorsimanersoq paasiniarneqartariaqartoq, nutaamik siunertaqarluartumillu suliniuteqarsinnaalernissaq anguniarlugu. Suliniut ukioq manna aallartinneqassaaq naatsorsuutigineqarlunilu suliniut 1 millionit koruuninik akeqassasoq.
Suliniutit arlariit pilersaarusiorneqalersut
Aserfallatsaaliuinermut, taarsersuinermut isiginnaarullu atorlugu misissuinernut atatillugu iliuuserineqartussat allat tassaapput:
Illoqarfinni kuuffiit puilasuliallu manngunnerani kuuttoortarnissaat ilimagineqarpoq, tamannalu artukkiisinnaasarluni.
Nuummi neriniartarfinnit, suliffeqarfinnit assigisaannillu orsumik mingutsitsisarneq ajornartorsiutaavoq.
Tasiilami ammerivimmit assigisaannillu orsumik igitsisarneq ajornartorsiutaavoq.
Nuummi, Tasiilami Paamiunilu kuuffiit taarsersorneqartarput kuuffiillu takinerulersinneqartuartarlutik.
Teknikimut Avatangiisinullu Ataatsimiititaliap januaarip 28-anni ataatsimiinnerani pilersaarutit pingasunik immikkoortortaqartut politikerinit akuerineqarnissaat ingerlatsivimmit neriuutigineqarpoq:
Imermut minguttumut pilersaarutit piviusunngortinneqarnissaannut suli suliassaqarpoq.
Pilersaarut ataatsimiititaliamit akuerineqarpat, taanna Avatangiisinut Naalakkersuisumut ingerlateqqinneqassaaq. Sapaatip akunnerini arfineq-pingasuni tamanut tusarniaassutigineqaqqaassalluni, kingornalu Teknikimut Avatangiisinullu ataatsimiititaliamut utertinneqassalluni, taamaalillunilu kommunalbestyrelsimi aaliangiivigineqarsinnaalissalluni.
