Kommuni ulloq unnuarlu paaqqinnittarfittaarusuppoq - Taakkuali naammattut Naalakkersuisut isumaqarput

Avannaata Kommuniani partiit borgmesteriutitaqartut, Siumut Nalerarlu, Ilulissani atuartut angerlarsimaffiat meeqqanut inuusuttuaqqanullu ulloq unnuarlu angerlarsimaffittut atulissasoq, kommunalbestyrelsip septembarip 25-ani ataatsimiinnerani aalajangerput. 

Meeqqat Ilulissat eqqaani nunaqarfinnit Ilulissanut ukiuni tulliuttuni atuariartorsinnaasut ikilissasut, taakkualu tamarmik Ilulissaniinnatik Uummannami inissaqassasut, ingerlatsiviup qinikkat aalajangernissaannut tunngavissamik suliaqarnermini ilisimatitsissutigaa.

- Siunissami atuartut amerlassusissaannik naatsorsuinermi Ilulissani inissat 21-t tamarmik atuartut angerlarsimaffiattut atorneqarnissaat pisariaqartinneqanngitsoq takuneqarsinnaavoq. Paasissutissat maanna pigineqartut naapertorlugit atuartut angerlarsimaffianni inissaqarnissamik pisariaqartitsisut amerlanerpaamik 21-t Uummannami inissaqartinneqarsinnaapput, ilaqutareeqarnermut ingerlatsivik allappoq.

Illuatungiliuttut, Demokraatit, Atassut Inuit Ataqatigiillu borgmesteriutitaqartut aalajangernerannut isumaqataanngillat. Atuartut angerlarsimaffiat innarluutilinnut angerlarsimaffittut atorneqassasoq, taakkua kissaatigigaluarpaat. Amerlanerussuteqarfiginnginnamikkuli tamanna pissanngilaq.

Meeqqat qulit, qulinit 18-it tungaanut ukiullit, angerlarsimaffissami kommunimit ingerlanneqartussatut pilersaarutigineqartumi angerlarsimaffeqarsinnaanissaat, Avannaata Kommuniata pilersaarutigaa.

Naalakkersuisut: Ulloq unnuarlu angerlarsimaffiit naammapput 

Meeqqanut, Inuusuttunut Inatsisinut Atuutsinneqarnerannut Naligiissitaanermullu Naalakkersuisoqarfik, Avannaata Kommuniani qinikkat amerlanerussutillit aalajangernerannit ullut sisamat qaangiuttut, tusagassiorfinnut nalunaarput. Nalunaarut ima qulequtaqarpoq: "Ulloq unnuarlu paaqqinniffinnik nutaanik qinnuteqarnermut ingerlariaatsip unitsikkallarneqarnera" 

Tassani pineqartoq tassaavoq Naalakkersuisut meeqqanut ulloq unnuarlu paaqqinnittarfinni inissat naammannersut pillugit misissuisimanerat. Inerniliussaq ersarippoq. 

- Naatsorsuinerup takutippaa ullumikkut inissaatigineqartut akuerineqarnikut ingerlasullu, inissiinissamut inissat pigineqartut pisariaqartinneqartut naammattut.

- Maannakkut ulloq unnuarlu inissat pillugit inissaqassutsip aammalu pisariaqartitsinerup uppernarsarneqarsimasup ataatsimut naliliiffigineqarnerat tunngavigalugu Naalakkersuisut naliliipput, maannakkut meeqqanut ulloq unnuarlu paaqqinniffinnik amerlanerusunik pisariaqartitsisoqanngitsoq. Taamaattumik ulloq unnuarlu paaqqinniffinnik nutaanik pilersitsinissamut qinnuteqarnissamut ingerlariaatsit unitsinneqarallarput, Naalakkersuisoqarfik allappoq.

Ingerlatsivik: Suliaq ingerlatissuarput

Sermitsiap Avannaata Kommuniani ilaqutareeqarnermut ingerlatsivik Naalakkersuisut qinnuteqarnissamik unititsigallarnerat pillugu attaveqarfigaa. Ingerlatsiviup kommuni suli qinnuteqarsimanngitsoq allakkatigut akissuteqarnermini ilisimatitsissutigaa.

- Namminersorlutik Oqartussat nalunaarutaat tunngavingalugu qinnuteqarsinnaaneq tunngavingalugu suliaq ingerlatissuarput. Unitsikkallarneqartumik oqariartuuteqarput taamaattorli unitsivinneranik oqariartuuteqartoqarani, kommunimi ingerlatsivik allappoq.

Taamaattumik kommunalbestyrelsip suliakkiutaa ilaqutareeqarnermut ingerlatsivimmit suliarineqaannassasoq, tassanngaanniit aamma ilisimatitsipput. 

Suliarli piviusunngussappat Naalakkersuisuit allatut isummernissaat avaqqunneqarsinnaassanngilaq. Suliassaqarfimmilu tassani pissutsit malinnaavigineqassasut, naalakkersuisoqarfik aamma allappoq.

- Naalakkersuisut aamma Isumaginninnermut Aqutsisoqarfiup suliassaqarfimmi ineriartorneq ataavartumik malinnaaffigissavaat. Inissaqassutsimik annertunerusumik imaluunniit immikkut pisariaqartitsisunut inissaqartitsinissamik uppernarsakkamik pisariaqartitsisoqalissappat, aalajangiineq nutaamik naliliivigineqassaaq, Naalakkersuisoqarfik tusagassiorfinnut nalunaarummini allappoq.