Kommunimi pisortaasimasoq millionilikkaanik peqquserlussimasutut unnerluutigineqartoq
Qeqqata Kommuniani pisortaasimasoq 3,7 millionit koruuninik peqquserlulluni tigusisimasutut unnerluutigineqarpoq. Suliami eqqartuussineq sisamanngornermi ullaap tungaani Sisimiuni aallartippoq.
Eqqartuussivik Qeqqap naatsorsuutigaa suliaq akunnerni marlunni naammassisinnaassallugu.
Assi: Dorthea Reimer-Johansen
Sisamanngornermi decembarip sisamaani nalunaaqutaq 9.00 kommunimi pisortatut atorfeqarsimasoq Sisimiuni Qeqqata Eqqartuussiviani sassartinneqarpoq.
Angut taanna Qeqqata Kommuniani 3,7 million koruuningajaat pillugit peqquserluttuliorsimasutut allakkanillu pappialanillu uppernarsaatissanik atornerluisimasutut unnerluutigineqarpoq.
Unnerluutigineqartup kommunimut akiligassat peqquserluutigalugit allakkiarisarsimavai, taakkulu suliffeqarfimmut piunngitsumut USA-miittuusaartitamut akiliutiginerartarsimallugit.
Akiligassat katillugit 26-usutut oqaatigineqarput, taakkulu 2020-mi marsip 2024-milu decembarip akornanni suliarineqarsimapput.
Ukiuni marlunni pineqaatisseqquneqartoq
Unnerluussummi angut taanna aningaasanik Qeqqata Kommunianit tigusinissaminut sulisup allap atsiorneranik issuaalluni eqqunngitsumik atsiortitsisarsimavoq.
Suliaq nassuernermik naammassineqartussatut suliarineqassasoq unnerluussissutigineqarpoq.
Unnerluutigineqartoq eqqartuunneqaruni ukiuni marlunni pineqaatissinneqarsimasut inissiisarfianniittussanngortinneqassasoq unnerluussisussaatitaasut isumaqarput.
Aningaasat utertinneqassasut piumasarineqarpoq, taakkulu saniatigut biilit, ATV-t qamuteralaallu arsaarinnissutigineqarnissaat aamma piumasarineqarluni. Taakku kommunimit taarsiiffigitinnissamik piumasaqartoqarsinnaanera eqqarsaatigalugu arsaarinnissutigineqassapput.
Sisamanngornermi nalunaaquttap-akunneri arlaqanngitsut ingerlaneranni suliap naammassineqarnissaa naatsorsuutigineqarpoq.
