Kalaallit Nunaanni kommunit aaqqissuunneqarnerisa allanngortinneqarnissaat politikkikkut kissaatigineqarlunilu innuttaasunit ukiuni kingullerni oqallisigineqarpoq, tassungalu atatillugu kommunit arlallit kommunerujussuit avinneqartariaqarnerat oqariartuutigisarlugu.
Maannakkut periuseq malillugu kommunit politikki pillugu innuttaasunut attaveqartarpoq, kommunillu avinneqarnissaanut siunnersuummik Inatsisartunut ingerlatitseqqiisarlutik. Naalakkersuinikkut Ataqatigiissaarisut saqqummersitaanni, Naalakkersuisut Aaqqissuusseqqinnermut Ataatsimiititaliap suliaa aallaavigalugu pingaarnerusunik toqqammavissanik tamakkuninnga aalajangiinissaq inissisimaffigigaat, atuarneqarsinnaavoq.
Kalaallit Nunaanni kommunit aaqqissuunneqarnerisa allanngortinneqarnissaat politikkikkut kissaatigineqarlunilu innuttaasunit ukiuni kingullerni oqallisigineqarpoq, tassungalu atatillugu kommunit arlallit kommunerujussuit avinneqartariaqarnerat oqariartuutigisarlugu.
Maannakkut periuseq malillugu kommunit politikki pillugu innuttaasunut attaveqartarpoq, kommunillu avinneqarnissaanut siunnersuummik Inatsisartunut ingerlatitseqqiisarlutik. Naalakkersuinikkut Ataqatigiissaarisut saqqummersitaanni, Naalakkersuisut Aaqqissuusseqqinnermut Ataatsimiititaliap suliaa aallaavigalugu pingaarnerusunik toqqammavissanik tamakkuninnga aalajangiinissaq inissisimaffigigaat, atuarneqarsinnaavoq.
Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisup Maritha Brobergip, Atassut, Erik Jensenimut, Siumut, paragraf 37 naapertorlugu apeqquteqaataanut akissummi atuarneqarsinnaavoq. Erik Jensenip kommunit avinneqarnissaat pillugu Naalakkersuisut qanoq pilersaaruteqarnersut apeqqutigaa.
Siumumi siulittaasuunikoq kommunit aaqqissuussaanerat nutaaq, kommunillu avinneqarnissaat pillugit politikkikkut takorluukkat erseqqissut saqqummiunneqarnissaat nukinginnartuusoq isumaqarpoq.
Isumaliutissiissut ukioq manna piariissasoq
Aaqqissuusseqqinnermut Ataatsimiititaliap isumaliutissiissutaa ukioq manna naammassineqarnissaa naatsorsuutigineqartoq Maritha Brobergip paasissutissiissutigaa. Naammassineqareerpallu Naalakkersuinikkut Ataqatigiissaarisoqatigiinnut Inatsisartunullu saqqummiunneqassaaq. Suliassanik agguataarineq nutaaq, ajornanngippallu kommunimik avitsinermut piareersaaneq 2027-miit 2029-p tungaanut ingerlanneqassaaq. Kommunit aaqqissuussaanerat nutaaq 2029-mi atulerluni, kommuninut nutaani kommunalbestyrelsemut qinersinerit ukiumi tassani aamma pisinnaassapput.
Siunnersuutit aalajangersimasut
Aaqqissuusseqqinnermut Ataatsimiititaliaр isumaliutissiissutaa kommuninut nutaanut piviusunik inassutinik imaqassasoq Naalakkersuisoq paasissutissiivoq. Aaqqissuussaaneq siammasissoq maanna atuuttoq iluarineqanngitsoq, nalilersuinermiit nalunaarusiami 2024-meersumi atuarneqarsinnaavoq. Taamaammat nutaanik sinaakkuteqalerlunilu aaqqissuusseqqinnissamut pisariaqartitsisoqarneranik ersersitsisoq, Maritha Broberg paasissutissiivoq.
- Aaqqissuusseqqinnermut Ataatsimiititaliap suliassaraa toqqammavissanik aalajangersaanerit, ilanngullugu kommunit nutaat minnerpaamik isumagisinnaasassaattut kommunini tunngaviusutut suliassanut allattuiffik.
- 2025-mi januaarimit BDO-mit nalunaarusiami misissueqqissaarinerup takutippaa kommuninut anginernut naleqqiullutik 2000-it inorlugit innuttalittut kommunit mikinerit innuttaasunut ataasiakkaanut tamanut malunnartumik annertunerusunik aningaasartuuteqassasut, ilaatigut aningaasaqarnerup, HR-itut, aamma qarasaasialerinerup isumannaatsuutinnissaatut ittunik pinngitsuugassaanngitsutut atuuffinnut ikinnerpaatut inuttaliinissamut piumasaqaatit pissutigalugit, Maritha Broberg paasissutissiivoq.
BDO Danmarkimi siunnersuisarfiit kukkunersiuisarfiillu annersaasa ilagaat.
Aqqusaagassat pingasut
Kommunit avinneqarnissaat aalajangerneqarpat, tamanna suliassanik pingasunik aqqusaagassanik aaqqissuunneqassasoq Maritha Brobergip ilisimatitsissutigaa. Siullermik Aaqqissuusseqqinnermut Ataatsimiititaliap isumaliutissiissut toqqammavissanik imalik ukioq manna tunniutissavaa, tamatumalu kingorna Inatsisartuni suliarineqassaaq. Tamatuma kingorna kommunit sumiiffigisani oqaloqatiginnissapput, kommunillu avinnissaannut siunnersuuteqarsinnaallutik. Aammattaaq taasititsisoqassaaq, soorlu innuttaasut aalajangiinissamut tunngavimmut ilanngunneqassallutik.
Erik Jensenip 2029-mi kommunimut qinersisoqarnissaa sioqqullugu ikaarsaariarnermut pilersaarutit suut suliarineqarnersut paaserusuppaa. Naalakkersuinikkut Ataqatigiissaarisoqatigiit saqqummiunneqartut naapertorlugit, ikaarsaariarnermut pilersaarut politikkikkut oqallisigineqarnissaa innuttaasunillu peqataatitsinissamik sulineq ukiumi ataatsimi ingerlanneqarnissaa pilersaarutaavoq. 2027-mi tamanna pissaaq.
- Ukiut tullii marluk ajornanngippat kommunimik avitsinissamut, aammalu Namminersorlutik Oqartussat aamma kommunit akornanni suliassanik agguataariernup naleqqussarnissaata piareersarnissaannut atorneqassapput.
- Aaqqissuusseqqinnermut Ataatsimiititaliap suliaa kommuninut pingaarnertut toqqammavinni atuutsinneqalissaaq, tamatuma kingornatigut siunissami immikkoortiterineq tamanna pillugu aalajangiisarnermut ingerlattagaq sumiiffigisami inissisimaffimmut inissinneqassalluni, taamaaliornikkut kommunit innuttaasullu akornanni sumiiffigisami toqqammaviliinermik piginnittooqataanermillu qularnaariniarluni, Maritha Broberg Erik Jensenimut paasissutissiivoq,
Naammaginanngitsoq
Erik Jensenip, Siumup 2020-miit 2025-mut siulittaasuata, Naalakkersuisut akissutaat naammaginngilaa.
- Kommunit aaqqissuussaanerata allanngortinneqarnissaanik kommunit innuttaasullu kissaataat Naalakkersuisut malinniarneraat paaserusuppara.
- Kommunit avinneqarnissaat pillugu apeqqutinnut akissutit politikkikkut takorluugaqarnermik imaqannginnerat uggornarpoq, taamaattumik paragraf 37 naapertorlugu apeqqutiga allanik apeqquteqarnissamik kinguneqarpoq, Inatsisartunut ilaasortaq Erik Jensen, Siumut, oqarpoq.
Assi: Oscar Scott Carl
- Siunissami kommunit qanoq aaqqissugaanissaat pillugu politikkikkut takorluukkat erseqqissut akissutigineqarsorinngilakka, kisianni atorfillit suliaat ingerlareersut pillugit paasitinneqaannarpunga, oqarpoq.
Maritha Brobergip 2029-mi kommunalbestyrelsinut qinersisoqarnissaa sioqqullugu ikaarsaariarnermut pilersaarutit suut aallartinneqassanersut erseqqisumik aamma akinngikkaa Erik Jensen isumaqarpoq.
- Jess Svanep (Siumut) Kommunimut qinersisoqarnissaa sioqqullugu ikaarsaariarnermut ataatsimiititaliamik pilersitsinissaq pillugu Aaqqissuusseqqinnermut Ataatsimiititaliaq qanoq inissisimanersoq, Inatsisartuni oqaluttarfimmiit juunimi aamma akissutissarsiorpaa. Akissut allakkatigut nassiunneqassasoq Maritha Broberg oqarpoq, taannali suli tiguneqarani. Naammaginanngilaq, oqarpoq.
Kommunit avinnissaq kissaatigaat
Avannaata Kommuniata avinneqarsinnaanera pillugu innuttaasunik taasititsineq novembarip 26-ani 2024-mi pivoq. Taasititsineq inatsisitigut pituttugaanngilaq, innuttaasulli qanoq isumaqarnerannik takussutissaalluni. Innuttaasut amerlanerussuteqartut Avannaata Kommuniata avinneqarnissaa kissaatigaat, tamannalu Naalakkersuisunut Inatsisartunullu siunnersuutitut ingerlateqqinneqarluni.
Nanortalik Kommune Kujallermit avissaarnissaarluni nammineq kommuninngussanersoq innuttaasunik 2024-mi februaarimi taasissutigineqarmat amerlanerussuteqartut akuersissutigaat. Nanortalimmi nunaqarfiinilu innuttaasut atsiornerinik 800-t missaanniittunik 2025-mi katersuisoqarpoq, taakkunani Kommune Kujallermit avissaarnissaq kissaatigaat.
Qeqqata Kommuniani Maniitsup nammineq kommuninngornissaa aamma kissaatigineqarpoq. 2025-mi novembarimi innuttaasunik taasititsisoqarpoq, amerlanerussuteqarluartut avinnissaq taperserpaat.
Tunumi 2025-mi aamma oqallinneq annertuvoq, Tasiilami innuttaasut amerlanerpaartaat politikkerillu sumiiffimmeersut Kommuneqarfik Sermersuumit avissaarusupput.
Qeqertarsuup Kommune Qeqertalimmit avissaarluni nammineq kommuninngornissaa ukiorpassuarni aamma oqallisaavoq, tamannali pillugu innuttaasunik taasisitsisoqarnikuunngilaq.
