Qasigiannguani marsip 28-ani Avannaata Qimussersuaqalerpat Jeff Landry isiginnaartunut ilaasussanngoraluarpoq.
Jeff Landrymmi takornariartitsivik Experience Qasigiannguit aqqutigalugu marsip 25-ani tikittussaagaluarpoq.
Qasigiannguani marsip 28-ani Avannaata Qimussersuaqalerpat Jeff Landry isiginnaartunut ilaasussanngoraluarpoq.
Jeff Landrymmi takornariartitsivik Experience Qasigiannguit aqqutigalugu marsip 25-ani tikittussaagaluarpoq.
Takornariartitsiviulli ilaqutariinnik pigineqartup Experience Qasigiannguit neqeroorutertik tunuartikkaat KNQK-p ataasinngornermi nalunaarutigaa.
- Oqaasissaqarpallaanngilanga, qisuariaataat takunikuuagut.
Suna qisuariaat?
- Isumaqataannginnerat (KNQK-p isumaqataannginnera aaqq.), Kristian Jeremiassen oqarpoq.
Taassuma takornariartitsivitsik ilaqutariillutik ingerlallugu erseqqissaatigaa, neqerooruteqarsimanertillu KNQK-mit isornartorsiorneqareersorlu ilaqutariiullutik eqqartoriarlugu tunuartissallugu aalajangerput.
- Ataqqisariaqarsimavarput kattuffiup taama oqariartornera. Allanik iluaalliortitsinissarput kissaatigisimanngilarput.
Pakatsivoq
Tunuartitsinertilli uggoralugu isertuutinngilaa.
- Pakatsivunga inuup taassuma tikinngitsoorneranut. Qasigiannguanut aamma inuussutissarsiornikkut annertoorsuarmik sunniuteqassagaluarmat, Kristian Jeremiassen oqarpoq.
Arlaatigut peqqissimissuteqarpit neqeroorummik Jeff Landrymut nassiussisimagaluarnernut?
- Naamik. Pakatsinngilagut, takornariaqarnermut tunngasumik ineriartortitsinissarput siunertariinnarparput, aamma nunap kusanartup misitinnissaa, Kristian Jeremiassen oqarpoq.
Taassuma erseqqissaatigaa Qasigiannguit inukilliartormat suliffissallu ikiliartormata, aamma ukiuunerani takornariaqarneq unittooqqasarmat siuarsaanissaq pisariaqartoq.
Eqqortuuami nunatsinnik tiguaaniarnermik suliaqartussat siuarsaatitut atussappata?
- Takornariarniartut takornariassapput inuit sunniisinnaassusillit, aamma tamakkua pinngortitatsinnik qanoq pitsaatigisumik kusanartigisumillu misigisaqartinnissaat pingaartorujussuuvoq, Kristian Jeremiassen naggasiivoq.
