Kujallermi ukiortaami oqalugiarneq: Ukioq ilungersunartorpassualik

Malene Vahl Rasmussen (D) apriilimi Kommune Kujallermi borgmesterinngorpoq, taamaalillunilu siullerpaamik ukiortaami oqalugiarpoq.

Oqalugiaammini Kommune Kujalliup ilungersunartumik inissisimaffii eqqartorpai. ’Unamminartut’ annersaasa ilagaat kommunip aningaasaqarnerata ajornera, tamatumunngalu Malene Vahl Rasmussenip kommunalbestyrelsiusimasut pisuutippai.

- Ukiuni kingullerni, kommunemi aningaasanik aqutsinerluttoqarsimaneranik aallaaveqartumik kommune aningaasaqarnera naqqanneriarujussuarnikoq, sulisunik ikilisaasoqarnikoq,  ingerlatsivinnilu ataavartunik pisortaqanngitsoq suliffik iserfigaara, oqarpoq. 

Kommuni Namminersorlutik Oqartussanut aningaasarpassuarnik akiitsoqarpoq, taakkulu ukiuni tulliuttuni akilerneqartariaqarput. Taamaattumilllu akileraartarnermut procenti ataatsimik qaffanneqartariaqarsimavoq.

Aamma isumaginninnermut aningaasartuutit annertusigaluttuinnarput, ingammik meeqqat inuusuttullu innarluutillit pillugit — suliaqarfillu Namminersorlutik Oqartussanit tiguneqarallarsimalluni.

- Aningaasaqarnikkut pissutsit eqqarsaatigalugit kommunalbestyrelsi aalajangerpoq inatsisitigut suliassat pingaarnerpaatinniarlugit, tassami taakku kommunip pisussaaffigai. Innuttaasut inuussutissarsiortullu qanimut suleqatigalugit kommunip ineriartortinnissaa pingaarnertut anguniagarparput, kikkullu tamarmik ineriartortitsinermut peqataarusuttut tikilluaqquagut, Malene Vahl Rasmussen oqarpoq.

Meeqqanut paaqqinnittarfiit ineqarnermullu akiliutit qaffannerat

Borgmesteri oqarpoq kommunimi ilaqutariit atugarissaarnerunissaat anguniarlugu politikkikkut suliniuteqartoqartoq.

- Meeqqerivitsinnut utaqqisunik tulleriiaarisarneq eqqarsaatigalugu kommunitsinnut nuullutik suliartortut meerai utaqqisuni salliunneqartartussanngorlugit politikkikkut aaqqiissuteqarnissarput sulissutigaarput, oqarpoq. 

Ineqarniarneq aamma ajornartorsiutaavoq. Kommunip illut inueruttut tuniniassagai, illullu inueruttut amerliartornissaat pinngitsoortinniarlugu ineqarnermut akiliutit 2026-mi qaffanneqassapput, inissiat attartorneqartut aserfallatsaaliorneqarnissaat eqqarsaatigalugu, Malene Vahl Rasmussen oqarpoq

- Akitsuiniaannarlunili akitsuisoqannginnissaa anguniarlugu, annertuumik piumasaqaatitalimmik INI A/S-mut aningaasat uninngaannarnatik sulisinneqarnissaanik piumasaqarpugut, oqarpoq. 

Mittarfiit nutaanillu aningaasaliissutit

Qaqortumi mittarfik apriilimi ammarneqassaaq. Suliniut tapersersorneqarlunilu aammali naammagittaalliutigineqarpoq.

Malene Vahl Rasmussenip oqalugiarnermini oqaatigaa ammaanersiorneq aamma Narsarsuarmi mittarfiup ukiuni 80-ini kommunimi mittarfittut pingaarnertut atorunnaarneranut ersiutaassasoq.

- Ilaqarpugut ukiorpassuarni Narsarsuarmi sulinermikkut angerlarsimaffeqarnikkullu mittarfiup matuneqarnissaanik misigissutsikkut attortisimasunik,  oqarpoq. 

Tuppallersaatigineqassaarli Narsarsuaq nunaqarfittut matuneqalinngimmat. Borgmesterillu upperaa pinngortitaq immikkuullarissoq atortorissaarutillu pioreersut pissutigalugit nunaqarfiup ineriartortinneqarnissaanut periarfissarpassuaqartoq, tamannalu kommunip tapersersorniarpaa.

2025-mi aamma nalunaarutigineqarpoq Qaqortumi umiarsualivimmut danskit naalagaaffiat aningaasaliiniartoq, tamannalu Malene Vahl Rasmussenip kommunip siunissaanut isumalluartumik isiginninnissamut pissutissaqartippaa.

- Kujataani sanaartornissaq aamma piffissaq ungasinnerusoq eqqarsaatigalugu Qaqortumi umiarsualivissuaq nutaaq umiarsuarnut anginerusunut inissaqartitsisoq, tamanna isumaqarpoq, oqarpoq.

Kommunip akisussaaffigaa Kujalliup toqqissisimanartuunissaa pitsaasuunissaalu, meeqqanit utoqqarnut. Ukiortaami kikkut tamarmik peqqissuunissaat, toqqissisimanissaat ingerlalluarnissaallu kissaatigalugu, oqalugiaatini taama naggaserpaa.