Kujataani imigassamik aalakoornartulimmik inerteqquteqartoqalernerata kingorna qapuaqqat piumaneqangaatsialersut

Kujataani imigassamik tuniniaaneq matugallarneqareersorlu Pilersuisup pisiniarfiini qapuaqqat tunisaalluaqaa.

- Soorlu qapuaqqat ataatsikkut 47-t pisiarineqarsimapput nunaqarfimmi, taanna aamma soorunami pissusissamisuunngilaq, KNI-mi  sulisoqarnermut, attaveqaqatigiinnermut piujuartitsinermullu pisortaq Juliane Henningsen Heilmann Sermitsiamut oqaluttuarpoq.

Nunaqarfimmi sumi qapuaqqat taama amerlatigisut pisiarineqarsimaneri taassuma oqaatigerusunngilaa.  

Arlaatigut ilimagisaqarpisi sooq taama pisiniartoqartigineranik? 

- Taanna oqaaseqarfigivallaarsinnaanngilara, kisianni paasivarput annertuukkaarlugit pisisoqarsimasoq.

Qapuaqqat nunnguaannarpaat

Qapuaqqat taama tunisaatigilernerat peqqutigalugu pisiniarfiit ilaat nunguutsisimapput.

- Ulluni kingullerni qapuaqqanik annertuumik pisiniartoqaqattaarnerani nunguutsillattaaleramik, taava uagut KNI-mi nioqqutissanik pisariaqartunik pilersuisuuvugut. Taamaattumik nalilersimavarput qapuaqqat killilersorniarlugit, illoqutigiinnut annerpaamik sisamat pisiarineqarsinnaassasut, Juliane Henningsen Heilmann oqarpoq. 

Qaqugu tungaanut killilersuissavisi? 

- Kommune Kujalleq KNI-minngaanniit ataatsimeeqatiginikuuarput. Malinnaavigissavarput soorunami piffissaq tulliuttoq qanoq pisoqassanersoq. Oqarsinnaanngilagut massakkut killilersuinerit qaqugu tungaanut atuutissanersut. Uagutsinnut pingaarnersaasarpoq nioqqutissanik naammattunik innuttaasunut peqarnissarput, Juliane Henningsen Heilmann taama naggasiivoq.