Lagmandi: Nammineernerulernissarput anguniartuarparput – aamma aningaasaqarnikkut

Ataasinngornermi unnukkut, ministeriunerup Naalakkersuisullu siulittaasuata Qooqquni tusagassiortunik katersortitsinerisa kingorna, Savalimmiuni lagmandi oqaaseqassalluni sassarpoq.

Tusagassiortunut amerlanernut Beinir Johannesenimik, Savalimmiuni 2026-mi apriilimili politikikkut siuttuusumik naapitsineruvoq siulleq.

– Ullaaq manna Ursula von der Leyen ataatsimeeqatigaara. Assersuutigalugu aalisakkanik qalerualinnillu tunisassiatta EU-mi niuerfimmut pitsaanerusumik eqqussorneqarnissaat sammivarput, Beinir Johannesen aallarniivoq.

– Oqaloqatigiinneq maanna aallartitassaavoq, immikkoortumilu qanoq pisoqarumaarnera takussavarput.

Taassuma siuttuunerani Savalimmiut Danmarkimit naalagaaffeqatigiinnillu avissaarnissamik anguniagaqarnersoq, Johannesen aperineqarpoq.

Lagmandip Savalimmiut naalagaaffinngornissaa toqqaannartumik oqaatiginngilaa, nammineerneruleriartornermillu suliaqarnini aalajangiusimanerujumallugu.

– Nunarsuarmioqatigiit kattuffissuisa ilaanni, ullumikkut ilaasortaaffiginngisatsinni ilaasortaarusuppugut. Danskit naalakkersuisuisa toqqammavianni Savalimmiut nunanut allanut politikikkut pisinnaatitaaffeqarnerulernissaat aamma taaneqarpoq, taanna oqarpoq.

Savalimmiut nammineq erfalasortik atorlugu timersortartunik OL-mut aallartitaqarumanera, tusagassiortup taavaa. Lagmandili aalisarnermut uterpoq:

– Assersuutigalugu NEAFC-mi NAFO-milu suliniaqatigiiffiupput ullumikkut Kalaallit Nunaallu ilaasortaaffigisagut. Arlaatigooriarlutali aamma aporaattarnerput uagut pivarput, soqutigisagummi assigiittuaannanngillat, Beinir Johannesen ilassusiivoq.

NEAFC NAFO-lu suliniaqatigiiffiupput Atlantikorsuarmi aalisarnermi malittarisassiorfiit.

Ataatsimoortumik tapiissutit annerpaaffileraat

Beinir Johannesenimullu nunani tamani sinniisoqarnissaq kisimi pineqanngilaq:

– Nammineernerulernissarput sulissutigiuarparput, aamma aningaasaqarnikkut, taanna erseqqissaavoq.

Taamaammallu Savalimmiut ataatsimoortumik tapiissutit annertussusaannik killiliipput. Taamaalilluni aningaasat naalagaaffimmeersut aningaasaqarnerup siuariartornera ilutigalugu annikilliartortarput.

– Tamanna aningaasaqarnikkut nammineerneruleriartornermut alloriarneruvoq. Namminersorlutilli inuussutissarsiortut pitsaasunik sinaakkuteqartinnissaanut aammat tunngassuteqarpoq, taamaalilluni Savalimmiuni namminersorlutik inuussutissarsiortut alliartorsinnaaqqullugit, Beinir Johannesen oqarpoq.