Landry nassatanik tigooraavik avaqqutaaraa

USA-p præsidentiata Trumpip Kalaallit Nunaannut immikkut aallartitaa, Louisianami guvernøri Jeff Landry, sapaatip akunnerata siuliani timmisartumik C-40-mik Nuummut tikimmat, Kalaallit Nunaannit pisortatigoortumik ilassineqanngilaq.

Landry Naalakkersuisunit soorunalimi qaaqquneqanngilaq, Trumpili sinnerlugu Kalaallit Nunaannukarluni — Future Greenlandimi ataatsimeersuarnermi siunertarerpasillugu.

Taamaakkaluartoq inuussutissarsiornermik ingerlataqartut allat ataatsimeersuarnermut peqataajartortunit allaanerusumik pineqarpoq.

Mittarfiup iluani tikilluaqquneqartoq

Landry mittarfiup iluanut biilinik pingasunik Amerikamiut Nuummi sinniisoqarfianniit tikilluaqquneqarpoq. Sinniisoqarfimmi sulisunit guvernørip nassatai teqqiallit Maga-mik allannillit aningaasallu sukkulaamik sanaat biilinut ikorarneqarput. Ilanngaaserisunut pas-iminnik takutitsinngikkaluarlutik mittarfimmit ingerlapput. 

Qularnanngitsumik inuppassuit Nuummut tikinnerminni, nassatanik tigooqqaavik, ilanngaaserisullu aqqusaaqqaanngikkaluarlugit ingerlaqqissinnaanertik takorloortarpaat. Tamanna anguneqassappat qanoq iliortoqarsinnaanera pillugu Sermitsiamit Greenland Airports aperineqarpoq.

Mittarfiup iluani immikkut akuerisanik biilernissamut, aquttoqarnissamut piumasaqaatit, isumannaallisaanermullu akuersissutit tamakkua angussagaanni, qanoq sivisutigissanersoq paaserusupparput.

Isumannaallisaanermut tunngasunik apeqqummut tunngatillugu mittarfik akissuteqanngilaq

Naatsumik oqaatigalugu mittarfeqarfiit isumannaallisaanermut tunngatillugu apeqqut akiumanngilaat.

Greenland Airportsimi attaveqaqatigiinnermut pisortaq Stine Buur Hvistendal mailikkut ima allappoq:

"Nuup mittarfia timmisartunik assigiinngitsorpassuarnik angallavigineqartarpoq, ilaatigut timmisartut angallassisut, pisortat timmisartui, timmisartut attartorneqartut aamma timmisartut nammineq pigineqartut aqqusaartorfigiuartarpaat. Mittarfimmi malittarisassat, isumannaallisaanermut piumasaqaatit oqartussallu piumasaqaataat, tikinnermi aallarnermilu malinneqarnersut, ’Greenland Airportsip’ qulakkeerlugu suliassaraa.

Mittarfimmi isumannaallisakkamut, ilaatigut mittarfiup silataaniittumut (forpladsen aaqq.), isernissamut piumasaqaatit isumannaallisaaneq pillugu malittarisassanit atuuttunit aqunneqarpoq. Pissutsini assigiinngitsuni angallatit inuillu avataaneersut isersinnaapput, tamanna periutsinik atuuttunit, isumannaallisaanermut piumasaqaatinit pisariaqartunit maleruagassanillu atuuttunik naammassinnittoqarpat. Assersuutigineqarsinnaasut tassaapput peqqinnissaq pillugu upalungaarsimasut, oqartussat suliassaqarfii, kiffartuussinermik suliaqartut imaluunniit timmisartunik isumaginnittut, mittarfeqarfimmi atugassarititanik pisariaqartitsinngitsut.

Inuit angallatillu isumannaallisakkamut isertinneqaraangata, tamanna periutsit nakkutilliinerillu pineqartumut atuuttut malillugit pisarpoq. Mittarfinni isumannaallisaanissaq eqqarsaatigalugu Greenland Airports isumannaallisaanermut tunngatillugu periutsit, isernissamut periarfissat imaluunniit isumannaallisaanermi iliuuserisassat pillugit sukumiisumik paasissutissiinngilaq.

Timmisartut nalinginnaasuunngitsumik angallassisut timmisartumiit nunamut toqqaannartumik ingerlatinneqarsinnaasarput, minnermi mittarfeqarfimmi aqqusaagassat aqqutalugeqqaanngikkaluarlugit. Tamannali pisortat maleruagassaataannik malinninnissamik allannguinngilaq."

Attaveqaqatigiinnermut pisortap Hvistendalip akissutaa Sermitsiap siusinnerusukkut mittarfimmi isumannaallisaanikkut pissutsit pillugit paasiniaanermini pissarsiarisimasaanut naapertuulluinnarpoq. Ilaatigut mittarfik milliardinik akeqartoq ammarneqarmat, Angallassinermut Aqutsisoqarfiup piumasaqaatai malillugit piffissani arlalinni nunanut allanut timmisartuussinerit isumannaallisaanermi ajornartorsiuteqarneq pissutigalugu matuneqartariaqarsimapput.

Billundi isertuannginneruvoq

Billundip mittarfiani, Nuummi mittarfimmi malittarisassat atorneqartut assigalugit ingerlatsiviusumi, paasissutissanik taama isertuussitiginngilaq. Billund mittarfiata nittartagaani suliffeqarfinnut, mittarfimmi sumiiffinni isumannaallisakkani atuinissamut ilitsersuutinik peqarpoq.

Biilit mittarfimmiit akuerineqaqqaartariaqartut, aamma biilertoq Billundip mittarfiata iluani (Airside) biilinik ingerlatsinissamut akuerineqaqqaartinnani teorii tunngavigalugu aamma praktikki tunngavigalugu pikkorissartariaqartoq, akuersissuteqarnissamut piumasaqaataasoq, tassani ilaatigut atuarneqarsinnaavoq. Biilernermik ilinniarnerup teoriianik immikkoortua internetikkut ingerlanneqartarpoq, misilitsinnerlu timmisartoqarfinni nakkutilliisunit (mittarfinnik misissuisartunit timmisartunillu inissaminnut inissiisitsisartunit) ingerlanneqartarluni.

Billundimiit ilitsersuutit atuareerlugit Stine Buur Hvistendalimut uterfigaarput. Billund taamaaliorsinnaappat Nuummi mittarfik aamma taamaaliorsinnaassaaq, eqqarsarpugut.

Taamaattumik paaserusupparput kikkut qassillu Nuummi taama ittumik akuersissuteqarnersut – aamma qinnuteqaatit suliarineqarnerat qanoq sivisutigisarnersoq paaserusupparput. Tullianik Kalaallit Nunaannut qaaqqusinnginnermi piareersarnissamut piffissaqarfigineqarsinnaaniassammat.

Tamanna paasisaqarfigerpiarsinnaanngilarput.

“Inuit angallatillu isumannaallisaanermut tunngasunut isernissamut akuersissummik pissappata, tamanna periutsit nakkutilliinerillu pissutsini aalajangersimasuni atuuttut malillugit pissaaq. Mittarfinni isumannaallisaanissaq eqqarsaatigalugu Greenland Airports isumannaallisaanermut tunngasunik sukumiisunik paasissutissiinngilaq, soorlu qanoq isersinnaanermut tunngatillugu imaluunniit qanoq isumannaallisaanissamut iliuuseqartoqarnersoq pillugu”, Stine Buur Hvistendal mailikkut nangippoq.