Løkke: EU-p Issittoq pillugu periusissiaa Europap sunniuteqarluarnerulernissaanut nukittorsaassaaq

EU-Kommissionip Issittoq pillugu periusissiaa nutaaq "tikilluaqqunartoq“, Danskit nunanut allanut ministeriata Lars Løkke Rasmussenip nittartakkatigut inuit attaveqaqatigiittarfianni X-mi allappoq.

- Nunarsuarmi politikkikkut pissutsit allanngoriartorneranni Issittoq pingaaruteqarneruleraluttuinnarpoq. EU-p Issittoq pillugu periusissiaa tikilluaqqulluinnarpara, Lars Løkke Rasmussen allappoq.

EU-mi kommissionip periusissiaq marlunngornermi saqqummiuppaa, maannalu EU-mi nunanit oqallisigineqassaaq.

Periusissiaq taanna periusissiami kingullermi 2021-meersumit allaanerulluinnarpoq. Maanna EU-mi kommissionip isumannaallisaanerup pingaartinnerulernissaa ukkataraa.

Tamatuma saniatigut nunap immikkoortuani aningaasaliinerit annertusiartupiloorput.

Tamanna ajunngitsumik alloriarnerusoq, Lars Løkke Rasmussen periusissiaq pillugu isumaqarpoq.

- Tamanna Issittumi innuttaasunut iluaqutaasumik — EU-p Issittumi sunniuteqarnerunissaanut aqqutissiuissaaq, aammali Europamut tamarmut suleqatitsinnullu qanimut attuumassuteqartunut iluaqutaassaaq, Lars Løkke Rasmussen X.-imi allappoq.

Aammattaaq periusissiami Europap Issittumi pissutsini iliuuseqarnissamut piginnaaneqarnerunissaa anguniarneqarpoq.

Ilaatigut taamaaliortoqassaaq Europami sikusiutit amerlanerulernerisigut.

EU-mi kommissioni naapertorlugu EU-mi nunat 27-t katillugit sikusiutinik qulinik peqarput, Ruslandilu 40-nik peqarnissaa missingiunneqarpoq.

Aammattaaq periusissiami EU-p Kommissioniata siunnersuutigaa avannaata imartaani killeqarfiit immallu naqqani attaveqaatit pingaarutillit illersorneqarnerulernissaat.

Ilaatigut imaatigut isumannaallisaanermut qitiusumik nutaamik pilersitsinikkut.

Issittumi imarsiornermik nakkutilliinermut iluaqutaassaaq.

Atlantikup avannaani Issittumilu immap naqqatigut kabelinik nakkutilliillunilu illersuisussamik iluarsaassisussamillu, EU-p kommissionia "Issittumi kabelit qitiusumik sullissiviannik“ pilersitsissaaq.

RITZAU