Mads Pedersenip akisussaaffii Nivi Olsenip tiguai
Meeqqanut, Inuusuttunut, Ilaqutariinnut Nunamullu Namminermut Naalakkersuisoqarfik Nivi Olsenimit akisussaaffigineqalerpoq.
Assi toqqorsivimmiit: Leiff Josefsen
Taamanikkut Naalakkersuisuusoq Mads Pedersen inuttut inissisimaffimminik aallaaveqartumik ingerlaannaq atuutilersumik atorfimminit tunuarniuteqarluni decembarip 9-anni nalunaarpoq.
Tamatuma kingorna Naalakkersuisut siulittaasuata Pedersenip akisussaaffii, tassa meeqqat, inuusuttut, ilaqutariinnermut nunamullu namminermut tunngasut, akisussaaffigilerpai.
Meeqqanut, Inuusuttunut, Ilaqutariinnut Nunamullu Namminermut Naalakkersuisoqarfik Naalakkersuisunut ilaasortamit allamit, Nivi Olsenimut (D), akisussaaffiit tunniunneqartoq Naalakkersuisut ilisimatitsipput:
- Naalakkersuisut Nivi Olsen Meeqqanut, Inuusuttunut, Ilaqutariinnut Nunamullu Namminermut Naalakkersuisoqarfimmi Naalakkersuisutut nutaatut toqqarpaat. Naalakkersuisup Nivi Olsenip Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik ilanngullugu akisussaaffigaa.
- Toqqaanikkut suliassaqarfimmi sulinerup ataavartuunissaa qulakkeerneqarpoq, Naalakkersuisullu suleqatigiinnissaq qilanaaraat.
Naalakkersuisunut ilaasortat marluk, , Mads Pedersen (IA) aamma Bentiaraq Ottosen (A), ukiaanerani ataatsimiinnerup kingorna tunuarput.
Naalakkersuisunut ilaasortat nutaat akuerineqaqqaartariaqarput, tamannalu siusinnerpaamik Inatsisartut ataatsimiileqqilerpata pisinnaavoq. Tamanna pilersaarutit malillugit februaarip pingajuanni pissaaq. USA-mili pissutsit pissutigalugit Inatsisartut ataatsimiinnissaat siuartinneqartoq partiit siulittaasui nalunaarput.
