Maniitsumi atuarfik annertuumik ikuallattoq – pujoq ingalassimasiuk

Politiinit paasissutissiissutaannik ilassuserlugu nutarterneqarpoq.

Maniitsumi Atuarfik Kilaaseeraq Sapaammi ualikkut annertuumik ikuallarujussuarpoq.

– Ikuallanneq annertuvoq, qatsersisartullu ilungersorlutik sullipput. Inuit putsumit ingalassimanissaannik igalaallu matuneqarnissaat qinnutigaarput, pigaartut pisortaat Karsten Højrup Kristensen oqarpoq. 

Qatserineq qaqugu naammassissanersoq suli oqaatigineqanngilaq.

– Atuarfik iluarsaanneqarpoq, ikuallannerlu qalissialersuinermut atatillugu pilersimasinnaasoq, pigaartut pisortaat ilisimatitsivoq. 

Nutarterineq: Ikuallanneq aqunneqarsinnaalertoq, qatserinerli suli ingerlanneqassasoq, politiit sapaammi ualikkut sisamat missaanni nalunaarput. Innuttaasut sumiiffimmi assersorneqarsimasut ataqqinninnissaannik kajumissaarneqarput, tamanna qatserisartut politiillu suliassaannut oqilisaataassammat politiit Facebookimi allapput.

Ikuallattoqarnera sapaatiummat nal. 14.21 nalunaarutigineqartoq, pigaartut pisortaat Hans-Peter Berthelsen Sermitsiamut ataasinngornermi ullaakkut oqaluttuarpoq.

Qalissialersuinermut atatillugu ikuallanneq aallartissimasinnaasoq politiinit suli ilimagineqarpoq. Sanaartornermi ikuallanneq qalissianut siaruaappoq.