Maniitsumi atuarfiup ikuallannerata atuartut utaqqinissaat sivitsoraa

Ikuallanneq sapaammi ualikkut pilersoq atuarfiup iluarsaanneqarneranut pilersaarutaanut kinguaattoortitsissasoq, Atuarfik Kilaaseeqqami atuarfimmi siulersuisut qularutiginngilaat.

Iluarsaassinermik sulineq kinguaattuussasoq, tamannalu ilaatigut sanaartornermi atortussiat atuarfiup aulaniittut eqaarsaartarfianiittullu qatserinermut atatillugu imermik ikuallannermillu ajoquserneqarsimanissaata ilimanaateqartorujussuuneranik patsiseqartoq, iluarsaassinermik sulinermi pisortap uppernarsarpaa.

- Atuarfik ammarneqarnissamut juunimi 2027-mi piariissasoq neriorsuutigisinnaanngilarput. Ikuallanneq piffissamut pilersaarutitsinnut kinguaattoortitsivoq, atuartullu pilersaarutaaqqaartumit piffissami sivisunerusumi inini atuartitsiviugallartuniiginnarnissaat ilisimaarilluinnarparput, Sakarine Berthelsen, atuarfiup pisortarigallagaa Sermitsiamut oqarpoq.

Pisunilu aamma ikuallassunni pujorsunnilu piffinniit allanit iluarsaanneqartunit peerneqarsinnaanera aamma apeqqutaavoq. Taamaaliortoqarsinaanngippat tamanna aamma kinguaattoornermik malitseqarsinnaavoq, tamanna atuartut atuarlutik aallartinnissaannut iluarsartuussinermullu ataatsimoortumut tunngatillugu.

Atuarfimmi immikkoortut allat suli ikuallassunnimik pujorsunnimillu tipitupput.

Pujorsunnikkunnaartinniarlugu igalaat ammatinneqarput, qanorlu sukkatigisumik tipaarunnissaa, tipaarutivissanersorluunniit oqaatigissallugu suli siusippallaarpoq, Sakarine Berthelsen oqarpoq.