Maniitsumi toqusut marluk pillugit misissuineq naammassivoq

Kalaallit Nunaanni Politiit Maniitsumi angerlarsimaffimmi inuit marluk toqungasut, ataasinngornermi juulip arfernani nassaarineqartut, pillugit misissuinertik naammassivaat.

Politiit misissuinerminni pinerluttoqarsimatillugu misissueqqissaartartut Danmarkimit ikiortiseralugit tikisippaat.

Misissuinermi pinerluttoqarsimatillugu misissueqqissaartartut, inuit timaannik misissuineq inunnillu suliamut attuumassuteqartunik apersuinerit ingerlanneqarput.

- Toqusoqarnerani pinerluttoqarsimaneranut takussutissanik paasissutissanillu nassaartoqanngilaq. Taamaattumik suliaq naammassineqarpoq, politiillu misissuinertik ingerlateqqissanagu, politiit tusagassiuutitigut nalunaarummi allapput.

Toqusut ilaqutaat inuttullu atugaat eqqarsaatigalugit toqunermut pissutsit sukumiinerusumik paasissutissiissutigineqanngillat, politiit allapput innuttaasullu toqukkut qimagaasunut innimiginneqqullugit qinnuigalugit.