KL

DK

Maniitsup Sisimiullu avikkusunnerat oqaluuserineqassaaq

Ukiorpassuarni missingersuutit, akileraarutit kikkullu kommunimi suliassanik amerlanerusunik suliaqartarnersut pillugit assortuussutaasareersoq, Qeqqata Kommuniani kommunalbestyrelsip maanna Sisimiut Maniitsullu "avikkusunnerat maanna ataatsimiissutigilerpaat.

Tôrtia Reimer-Johansen
Journalist
Offentliggjort

Maniitsormiut 1.065-it  avikkusupput, taassuma saniatigut Sisimiormiut Maniitsormiut aningaasaliissutit pillugit naammagittaaliortarnerannut qatsussipput.

Sisimiuni innuttaasut 992-it avikkuusullutik atsiorsimapput.

-  Maniitsumut aningaasaliissutigineqartut naammaginagit suli amerlanerusunik perusullutik naammagittaalliortuarnerat qatsupparput.

Aamma:

-  Sisimiuni innuttaasut nammineerusuppugut.

Oqaluuserineqassaaq

Avikkusunneq maanna Qeqqata Kommuniani kommunalbestyrelsimi oqallisigineqassaaq. Sisamanngornermi oktobarip ulluisa 31-anni ataatsimiinnermi pissaaq.

Allaffeqarfiulli innersuussutigaa kommunimut qinersisoqareerpat qinikkat nutaat tamanna oqaluuseriumaaraat.

Aningaasatigut kingunissat suli qulaajarneqanngillat

Aningaasatigut allaffissornikkullu kingunissai suli qulaajarneqanngillat. Naalakkesuisullu ilisimatitsissutigaat nunatsinni kommunit avinneqarnissaanut aningaasatigut qanoq sunniuteqarsinnaaneranut nalunaarusiornissaminnut pilersaaruteqarlutik. Misissuinermut inernerit Inatsisartut aalajangiinissaanut aalajangiisuussapput.

Nalunaarusiaq ukioq 2024 naannginnerani Inatsartunut agguaanneqassaaq.

Kommunilli avinneqassagaluarpara nunatsinnut akisusinnaasoq BDO-p misissuinerata ersersippaa. Avannaata Kommuniata misissuisitsinerani erserpoq kommuni avissagaluarpat millionerpaalunnik akeqassasoq.

Naammagisimaarinninngitsut naammagisimaarinnittullu naligiittut

Innuttaasut amerligaluttuinnartut najugarisami oqartussaaqataanermik amigaateqarnermik oqariartuuteqartalermata kommunit aaqqissuussaanerat pillugu nalilersuinissamik Inatsisartut 2022-mi aallartitsipput, innuttaasullu naammagisimaarinninnerannik misissuineq 2024-mi septembarip aqqarngani tamanut saqqummiunneqarpoq

- Nuna tamakkerlugu innuttaasut akornanni naammaginninneq naammaginninnginnerlu assigiingajammik aveqqavoq. Taamaattorli Kommuneqarfik Sermersooq innuttaasut naammaginninngitsutuulli naammaginnittut marloriaataammata allaanerussutigivaa, taannalu nuna tamakkerlugu agguaqatigiissitsinermik qaffaavoq. Kommuneqarfik Sermersooq kisimiilluni kommuniuvoq naammaginninngitsuniit naammaginnittut amerlanerullutik. 

- Qeqqata Kommuniani naammaginninngitsuniit naammaginnittut assigiingajapput, kommunit sinneri innuttaasunik naammaginninngitsunik amerlanerussuteqartarlutik. Innuttaasut kommuninit nalilersuinerminni suut pingaartittarsimaneraat ersarinngilaq. Kommunini sullissiveqarfiit assigiinngitsut misissuataaraanni ersarinnerulissaaq, kommunit tamarmik immikkut nukittuffeqarlutillu sanngiiffeqartut, immikkoortut ilaat ingerlalluartut ilaallu suli pitsaanerulernissamut pisariaqartitsisut.

Taasititsineq Inatsisartut aalajangernissaanut aalajangiisussaasoq

Qeqqata Kommuniani kommunalbestyrelsip avinnisamut kissaat tapersersussappassuk innuttaasut taasitinneqassapput, taamaalilluni Inatsisartut aalajangiisussanngussallutik.

Aappaagu apriilimi 2025-imi kommunimut qinersisoqassaaq, allaffeqarfiullu innersuussutigaa qinersinerup kingorna qinikkat nutaat nalilersuissasut.

samfund kommunedeling qeqqata kommunia inuiaqatigiit

ATORFIIT Se alle jobs

Powered by Labrador CMS