Maniitsup talittarfia nutaaq atoqqaarfissiorneqartoq

Maanna talittarfik tamakkiisumik nutarterneqarsimasoq pisortatigoortumik atoqqaartinneqarmat Maniitsoq illoqarfiup nunallu immikkoortuani attaveqaatit ineriartortinneqarneranni pingaarutilimmik alloriarpoq. Suliarinninneq 2025-p naalernerani naammassineqarpoq, upernaarlu inaarutaasumik naammassinninnerup kingorna talittarfiup atortui nutaaliaasut atorlugit ingerlanneqarsinnaalerpoq.

AAMMA ATUARUK

Atlantkaji tunniunneqartoq: - pingaarutilimmik siuariarneruvoq, naalakkersuisoq oqarpoq

Naalakkersuisut taama ilisimatitsipput. Talittarfik ataasinngornermi juulip arfernani atoqqaarfissiorneqarpoq.

Ammaqqinneqarnera kommunimut, inuussutissarsiortunut, illoqarfimmut illoqarfimmiillu imaatigut angallannermut pingaarutilimmik alloriarfiuvoq. Attaveqaasersuutit nutaaliat nassiussanik ilaasunillu isumaginninnissamut pitsaanerusumik sinaakkuteqalersitsissallutillu, najukkami ineriartornissamut periarfissanik tapersersuissallutillu pilersuinermi attaveqaatit patajaallisarnissaannut qulakkeerinnissutaassapput.

- Imarpik ikaarlugu talittarfiup tamakkiisumik iluarsaanneqarnera Maniitsumut aammalu nunap immikkoortuani imaatigut attaveqaasersuutinut pingaarutilimmik siuariartitsissaaq. Suleqataasut tamarmik suleqatigiinnerat nukittooq, suliap pitsaasumik ingerlanneqarnissaanut, aammalu suliap ingerlanerani illoqarfimmut pilersuinerup ingerlaannarnissaanut illoqarfiullu ineriartornissaanut qulakkeerinniffiusoq iluarisimaartorujussuuara, Ineqarnermut, Attaveqaqatigiinnermut, Nunap Isorliunerusunut Upalungaarsimanermullu Naalakkersuisoq Iddimanngiiu Jensen Bianco (IA) oqarpoq.

Sanaartorneq KJ Constructionip, Royal Arctic Linep, Royal Greenlandip nunaqavissullu allat qanimut suleqatigiilluarnerannik ilisarnaateqarpoq.

Maniitsumi ulloq attaveqarnermut naalakkersuisup Iddimanngiiu Jensen Biancop kommunalbestyrelsimut ilaasortallu Gedion Lyberthip oqalugiarnerisigut nalliussineqarpoq. Nalliuttorsiornermut atatillugu talittarfimmi aamma kaffillertoqarpoq.