Maskiina sanaartugassanik suliassinneqartartut atortuat uppissimasoq orsussamik kuuttoortoq

Tallimanngornermi ualikkut nalunaaqutaq 15:04 Kalaallit Nunaanni Politiinut nalunaarutiginnittoqarpoq suliassaq avatangiisinut inatsimmut tunngassuteqartoq pillugu.

Nakkutilliisut pisortaat Jeppe Andsager oqaluttuarpoq, sanaartugassanik suliassinneqartartut maskiinaasa anginerit ilaat Kangilinnguani - sakkutuut imarsiortut sorsuutaasa umiarsualivianni – suliaqartilluni uppissimasoq pillugu nalunaarutiginnittoqarsimasoq.

Ajutoornermi inunnik ajoqusertoqarsimanersoq politiit nalunaarfigineqanngillat, taamaattorli maskiinap uppinnerata kingunerisaanik, orsussamik uuliamillu kuuttoorneq pivoq.

Politiinit Avatangiisinut, Pinngortitamut, Nukissiuutinut Ilisimatusarnermullu Naalakkersuisoqarfik pisoq pillugu ilisimatitsisoqarpoq, upalungaarsimasullu assiaqummik siaarsipput allatullu iliuuseqarlutik mingutsitsisoqarneranik saliillutik.

Pisoq taanna avatangiisinut tunngasoq eqqaassanngikkaanni nakkutilliisut pisortaat unnersiorpoq ulloq unnuarlu ataatsimut isigalugu eqqissisimanarsimasoq.