Meeqqat angerlarsimaffiup avataanut inissinneqarsimasut kikkunnit illersorneqarpat?

Ataatap kamassimaqisup allagaa qaammatialuit matuma siorna Facebookimi siammarterisoqarsimavoq, taassuma qitornaa ukiukitsoq isumapiloqarneq tunngavigalugu tatiginnilersinneqariaraluarsimasoq paasisimavaa. 

Tatiginnilersitsiniaasup allatai ataataasup assilillugit toqqorsimavai, tassanilu meeraq oqaatsinik atoqatigiinnermut tunngasunik, meeqqat taama ukiullit kikkunnilluunniit tusaasussaanngilluinnagaannik allaffigineqarsimasoq ersarilluinnartumik takuneqarsinnaavoq. Tamanna inuup silappeertup eqqarsartariaasianik alianartumik ersersitsivoq.

Ataataasoq politiinut nalunaarutiginneqqullugu oqaaseqaatini arlalinni kajumissaarneqarsimavoq.

Taamaaliorsimanersoq AG-mit uppernarsarneqarsinnaanngilaq. Ilisimavarpulli qinngasaaruttarneq akiorniarlugu peqatigiiffiup Tamattaasap siulittaasuata Erla Vintherip politiinut nalunaarutigisimagaa. Taamaaliorpoq „Tamattaasa" meeqqanik isumapiloqarluni tatiginnilersinniarneqarssimasunik, nittartakkatigut qinngasaarneqartartunik uupakaasinniarneqartartunillu pinaveersaartitsillunilu, paasiniaallunilu tapersersuinissamut pingaarutilimmik akisussaaffeqarlunilu suliassaqarmat, taanna taama AG-mut nassuiaavoq.

- Qinngasaaruttarneq akiorniarlugu peqatigiiffik isumapiloqarluni tatiginnilersitsiniaanerup akiorniarnerani sunniuteqarluarsinnaavoq. Pinaveersaartitsillutik, paasissutissiisinnaallutillu, tapersersuisinnaallutillu toqqissisimatitsisinnaagamik tamatuma saniatigut kommunit paaqqinnittarfiillu meeqqanik, timikkut qarasaasiakkulluunniit, isumannaallisaanermut akisussaaffeqarnerinik ikiorsinnaavaat. Ajoraluartumik aningaasaateqanngilagut – tamannali sulissutigaarput, Erla Vinther nassuiaavoq.

Allaaserisaq atuareerlugu meeqqat ulloq unnuarlu paaqqinnittarfinniittut ilaqutarsiaqartulluunniit, immaqa illersuinissaminnut pisinnaasakitsunik angajoqqaallit aammattaaq eqqarsaatigai.

- Kommunit meeqqanut paaqqinnittarfinniittunut, ilaqutarsianiittunut meeqqallu angerlarsimaffianniittunut inatsisitigut suliatigullu akisussaaffeqarput, taanna AG-mut oqarpoq nangillunilu:

- Kommunit meeqqap isumagineqarnera, illersorneqarnera tapersersorneqarneralu qulakkeertussaavaat, paaqqinnittarfik nakkutigisussaavaat meeqqallu atugarissaarneranut navianartorsiortitsisinnaasumik pisoqarpat iliuuseqartariaqarlutik, soorlu isumapiloqarluni tatiginnilersitsiniaasoqarpat, kinguaassiutitigut kanngutsaatsuliortoqarpat, nakuusertoqarpat sumiginnaasoqarpalluunniit. Meeqqat internetimi pissusilersoriaasiannik perorsaapalaartumik ataqqinnippaluttumillu nakkutilliisariaqarput, isumapiloqarlunilu tatiginnilersitsiniaasoqarneranik pasitsaassisoqarpat kommuni ingerlaannaq nalunaarfigisussaavaat, pinerlunnerlu ilungersunartuuppat politiinik suleqateqassapput.

Nalunaartussaatitaaneq aamma Killiliisa

Namminersorlutik Oqartussat meeqqanut pisortanit isumagineqartartunut internetikkut isumapiloqarluni tatiginnilersitsiniaaneq imaluunniit kinguaassiutitigut kannguttaatsuliorneq qanoq pinaveersaartinniaraat AG-p meeqqanut, inuusuttunut ilaqutariinnullu naalakkersuisoq apeqqutinik arlalinnik apeqquteqarfigaa.

Facebookimi qupperneq Erla Vintherip nalunaarutiginninneranut pissutaasoq niviarsiaqqanik 78-inik „ikinnguteqarpoq“. Ajorluinnarpoq, taanna oqarpoq.

- Quppernermi tassaniipput niviarsiaqqat 78-it - neriuppunga paaqqinnittarfinniittunik meeraqarnersoq politiit suleqatigalugit paasineqarsinnaassasoq.

Suliaq politiinut tunniunneqarsimasoq taamaammallu oqaaseqarfigineqarsinnaanngitsoq Naalakkersuisut akissuteqarput.

- Politiit isumaginninnikkut ikiorneqarnissamik pisariaqartitsisoqarsorippassuk, oqartussaasut pineqartut periutsit atuuttut malillugit akuliunneqassapput, naalakkersuisoqarfimmit allakkatigut akissummi oqaatigineqarpoq.

- Paaqqinniffiit angajoqqaarsiallu meeqqanik internetikkut isumapiloqarluni tatiginnilersitsiniaaffigineqartunik paasinninnissaannut iliuuseqarnissaannullu tunngatillugu Naalakkersuisut sunik piumasaqaateqarpat?

- Ulloq unnuarlu paaqqinnittarfinni angajoqqaarsiatullu sulisut meeqqanut tapersersuineq pillugu Inatsisartut inatsisaanni § 16 naapertorlugu meeqqat internetikkut isumapiloqarluni tatiginnilersinniarneqarsimanerinik pasitsaassisoqarpat kommuni ingerlaannaq nalunaarfigeqqullugu pinngitsoorani nalunaarutiginninnissamut pisussaaffeqarput, taakku ersarissumik akissuteqarput.

Tassa imaappoq ulloq unnuarlu paaqqinnittarfiit angajoqqaarsiallu meeqqanik inuusuttunillu internetikkut inuunerannik tapersersuinissaat akisussaaffigigaat, aamma internetikkut isumapiloqarluni tatiginnilersitsiniaasoqarpat imaluunniit allatigut atornerluisoqarpat iliuuseqartussaapput.

- Meeqqat inuusuttullu internetikkut pissusilersornerat pillugu oqaloqatiginerisigut, navianartorsiornermillu takussutissaqaleraangat toqqissisimanartumik oqaloqatigiiffiusinnaasumik pilersitsinikkut qisuariarnikkullu pinaveersaartitsinissaq perorsaanerlu pingaartinneqarput. Paaqqinniffik ulorianartumik attaveqateqartoqartillugu internetsikkulluunniit kannguttaatsuliortoqartillugu attaveqatigiinneq politiinut nalunaarutigalugulu kommuni Isumaginninnermullu Aqutsisoqarfik ilisimatittussaavaat.

- Pisut ilungersunartut nalunaarutigineqartartussaallutillu Isumaginninnermut Aqutsisoqarfimmit malinnaavigineqartarput.

Meeqqap inunnut aalajangersimasunut internetikkulluunniit attaveqartarneranut illersuinissaq pisariaqartoq nalilerneqarpat, paaqqinnittarfik pissaanermik atuinermut Inatsisartut inatsisaat naapertorlugu allakkanik pulaarnernillu nakkutilliisoqarnissaanik kommunalbestyrelsemut qinnuteqarsinnaavoq. Tamanna akuliunneruvoq, pissutsinili aalajangersimasuni pisariaqartarpoq, akissummi nangilluni allassimavoq, taamatuttaarlu Killiliisa pillugu suliniummut innersuussisoqarpoq, tassani meeqqat internetsikkut atornerlunneqartarneranni kommunit, politiit innuttaasullu suleqatigiinnerat ukkatarineqarpoq.

- Tamatumunnga atatillugu Red Barnets Slet-Det-ip atuagassiaatai kalaallisuunngortinneqarlutillusimapput, taakkulu “SoMe – inoqatinut attaveqaatinut ilitsersuut”-itut naleqqussarneqarput.

Ilitsersuutit kommuninut, atuarfinnut politeeqarfinnullu tamanut nassiussuunneqarput, tigulluarneqarlutillu, tamannalu nunap immikkoortuini assigiinngitsuni meeqqat inuusuttullu internetikkut illersorneqarnissaat pillugu suliniuteqangarluarneranut takussutissaavoq.

- Aammattaaq paasissutissat “Killiliisa – innuttaasunut” siammarterneqarsimapput. Paasissutissat taakkua isumapiloqarluni tatiginnilersitsiniaanermut atisaqanngitsunillu assilisanik videolianillu allap pigisaanik tatisilluni sioorasaarinermut inatsisinik paasiuminartunik ilisimasaqalersitsisarput, innuttaasullu aamma suliamik ilisimannittut internetikkut atornerluinerup pinaveersaartinnissaanut, ilisarsinissaanut qisuariarnissaannullu iluaqutigisarpaat.

POP Kalaallit Nunaanniilissasoq

Kalaallit Nunaanni Politiit Danmarkimi immikkoortortaqarfiannit, Politiets Online Patrulje-mit, ulluinnarni aamma POP-imik taaneqartartumit decembarimi tikeraarneqarput. Tamanna atorfinnik inuttassarsiuussinermik kinguneqarpoq, tassani politiimik kalaallisut oqaasilimmik ujartuipput. Piffissaq killeqarfiusoq qaangiuteqqammivoq, taamaammat Nuummi qanittukkut kalaallisut oqaasilik sulilissajunnarsivoq.

POP inuit nittartakkatigut attaveqaqatigiittarfinni assigiinngitsuni, soorlu TikTokimi, Instagramimi, Twitchimi Facebookimilu, sammisaqartartunut saqqummertarpoq.

- Kinaluunniit politiimut qarasaasiakkut attaveqarsinnaavoq — soorlu aqqusinermi politiimik naapitaqarsinnaasoq, Facebookimi allassimavoq.

Assersuutigalugu politiit oqaloqatigiinnernut peqataarusupput, assinik eqqunngitsumik siammarterineq qarasaasiatigulluunniit isertortumik attaveqarneq pillugit apeqqutinut akissuteqartarput meeqqat inuusuttullu internettimi isumannaatsumik angalasinnaaniassammata internetsikkut pinerlunnerit pinaveersaartinnissaannut siunnersuuteqartarlutik.